Ashish Shelar On Shivsena – पंतप्रधान नरेंद्र मोदी हे आज (गुरुवारी) मुंबई दौऱ्यावर येणार आहेत. मुंबईमध्ये पंतप्रधान अनेक प्रकल्पांचे लोकार्पण करणार असून ते शहरातील बी. के. सी. मैदानावर एका सभेला देखील संबोधित करणार आहेत. पंतप्रधान नरेंद्र मोदी यांच्या मुंबई दौऱ्यावरून राज्यातील राजकारण चांगलच तापलं आहे. शिवसेना (ठाकरे गट) नेत्यांनी पंतप्रधान नरेंद्र मोदी हे महाविकास आघाडी सरकारच्या काळातील प्रकल्पांचे उदघाटन करण्यासाठी येत असल्याचं म्हणत शिंदे -फडणवीस सरकारला डिवचलं आहे. ठाकरे गटाच्या नेत्यांच्या वक्तव्यावर आता मुंबई भाजपचे अध्यक्ष आशिष शेलार यांनी जोरदार हल्लाबोल केला आहे. मुंबईकरांच्या स्वप्नपूर्तीच्या आनंदाच्या क्षणात पण विरजण घालण्याचं काम ठाकरे गट करत असल्याचा आरोप शेलार यांनी केला आहे.
काय म्हणाले आशिष शेलार…
ठाकरे गटाकडून करण्यात येत असलेल्या वक्तव्यांबाबत ट्विट करताना आशिष शेलार यांनी, “आज मा. पंतप्रधान नरेंद्र मोदी यांच्या हस्ते भूमीपूजन आणि लोकार्पण होतेय ही सगळी मुंबईकरांची स्वप्नपूर्ती आहे…त्यामध्ये शिवसेना( उ.बा.ठा.) तुमचा काय संबंध? संबंध असलाच तर विरोध करण्या एवढाच! म्हणूनच आज मुंबईकरांच्या स्वप्नपूर्तीच्या आनंदाच्या क्षणात पण विरजण घालताय!” असं म्हंटलंय.
दरम्यान, ठाकरे गटाचे नेते संजय राऊत यांनी पंतप्रधान मोदी महाविकास आघाडीच्या काळातील विकासकामांचे लोकार्पण करण्यासाठी येत असल्याचं म्हंटलं होत. यानंतर ठाकरे गटाच्या नाईक नेत्यांनी राऊतांच्या सुरात-सूर मिसळला होता. आशिष शेलार यांनी याबाबत खरमरीत प्रतिक्रिया देताना, “याकूबची कबर सजवणे…मनसुख हिरेनची हत्या, दाऊदच्या मालमत्तांची खरेदी, बदल्यांमध्ये वसूली आणि सचिन वाझे… रस्त्यावर खड्डे, नाले सफाईत भ्रष्टाचार… कोविडमध्ये नातेवाईकांची भलामण… मेट्रो कारशेड रखडवणे.. ही तुमच्या काळातील विकास कामे..याचं सगळ श्रेय निर्विवाद तुम्हालाच..!” असा उपहासात्मक टोला लगावला.
अरविंद सावंत यांचे नाव वगळले…
दरम्यान, पांनतप्रधान नरेंद्र मोदी यांच्या हस्ते होणार असलेल्या लोकार्पण कार्यक्रमाच्या निमंत्रणपत्रिकेवरून अरविंद सावंत यांचे नाव वगळण्यात आले आहे. मुंबईमध्ये एकूण ६ खासदार असून त्यापैकी ५ खासदारांची नावे निमंत्रणपत्रिकेत टाकण्यात आली आहेत. मात्र अरविंद सावंत यांचे नाव वगळण्यात आले आहे. याबाबत सावंत यांनी, हा सरकारी कार्यक्रम असून कोण्या पक्षाचा नाही असं म्हणत संताप व्यक्त केला आहे.
