-->

कुख्यात गुंड गजा मारणे विरोधात आणखी एक गुन्हा दाखल

पिंपरी- कुख्यात गुंड गजा मारणे आणि त्याच्या दीडशे साथीदारांच्या विरोधात विना परवाना वाहन रॕली काढल्या प्रकरणी बुधवारी (दि. १७) हिंजवडी पोलीस ठाण्यातही गुन्हा दाखल केला आहे. यापूर्वी तळेगाव पोलीस ठाण्यातही गुन्हा दाखल आहे.

गजानन पंढरीनाथ मारणे (रा. कोथरूड, पुणे) आणि त्याचे दीडशे अनोळखी साथीदार, अशी गुन्हा दाखल झालेल्यांची नावे आहेत. पोलीस नाईक आबासाहेब कुंडलिक सूळ यांनी बुधवारी (दि. १७) हिंजवडी पोलिस ठाण्यात फिर्याद दिली आहे.

पोलिसांनी दिलेल्या माहितीनुसार, हिंजवडी पोलीस ठाण्याच्या हद्दीतील पवना पूल ते चांदणी चौक या दरम्यान बंगलोर मुंबई महामार्गावर तळोजा कारागृहातून सुटलेला आरोपी गजानन मारणे याने आपल्या शंभर ते दीडशे समर्थकांसह 30 ते 35 चार चाकी वाहनांमधून प्रवास केला. या प्रवासादरम्यान समर्थकांनी गाड्यांच्या बाहेर धोकादायक पद्धतीने उभे राहून अर्धवट शरीर बाहेर काढले.

तसेच आजूबाजूने जाणाऱ्या चालकांना कडेला गाड्या थांबविण्यास भाग पाडले. महामार्गावरून जाण्याचा त्यांचा हक्क असतानाही दहशतीच्या जोरावर त्यांना वंचित ठेवले. घोषणाबाजी करून इतर चालकांना पुढे जाऊ न देता शिवीगाळ करून दहशत निर्माण केली.

तसेच पोलिसांनी सर्व वाहन चालकांना थांबण्याचा इशारा केला असता ते निघून गेले. याप्रकरणी अधिक तपास सहाय्यक पोलीस निरीक्षक सागर काटे करीत आहेत

यापूर्वी तळेगाव पोलिस ठाण्याच्या अंकित असलेल्या शिरगाव पोलिस चौकीमध्ये गजा मारणे आणि त्याच्या साथीदारांच्या विरोधात गुन्हा दाखल करण्यात आला आहे. पोलिसांनी आरोपींचा ड्रोन कॅमेरा ही जप्त केला आहे. तसेच टोलनाक्यावरील सीसीटीव्ही फुटेजच्या आधारे 30 ते 35 वाहन चालकांची माहितीदेखील पोलिसांनी काढली आहे. लवकरच संबंधितांना चौकशीसाठी बोलावणार असल्याचे पोलिसांनी सांगितले.

डिजिटल प्रभात आता टेलिग्रामवर! चॅनल जॉईन करा व मिळवा सर्व महत्वपूर्ण अपडेट्स, चॅनल जॉईन करण्यासाठी येथे क्लिक करा

Leave A Reply

Your email address will not be published.