नवी दिल्ली : हरियाणातील सरकार स्थापनेसाठी भाजप सज्ज झाला आहे. मुख्यमंत्रिपदी विराजमान होणाऱ्या विधिमंडळ पक्षाच्या नेत्याची निवड लवकरच होईल. त्या निवडीसाठी भाजपने थेट केंद्रीय गृहमंत्री अमित शहा यांना केंद्रीय निरीक्षक बनवले. त्यामुळे भुवया उंचावल्या गेल्या आहेत.
नुकत्याच झालेल्या विधानसभा निवडणुकीत स्पष्ट बहुमत मिळवून भाजपने हरियाणाची सत्ता राखली. त्यामुळे त्या राज्यात सलग तिसऱ्यांदा त्या पक्षाचे सरकार स्थापन होईल. मावळते मुख्यमंत्री नायबसिंह सैनी यांना चेहरा बनवून भाजपने निवडणूक लढवली. पक्षाने विजयाची हॅट्‌ट्रिक केल्याने सैनी यांच्याकडेच नेतृत्वाची धुरा कायम राहणार असल्याचे मानले जात आहे.
मात्र, अनिल विज आणि राव इंदरजित सिंह या ज्येष्ठ नेत्यांनी मुख्यमंत्रिपदावरील दावा कायम ठेवल्याची चर्चा आहे. त्यामुळे विधिमंडळ पक्षनेत्याच्या निवडीवेळी पेच निर्माण होऊ शकतो, अशी कुजबूज सुरू आहे. त्या पार्श्‍वभूमीवर, भाजपने हरियाणासाठी केंद्रीय निरीक्षक म्हणून शहा आणि मध्यप्रदेशचे मुख्यमंत्री मोहन यादव यांची नियुक्ती केली.शहा यांची नियुक्ती लक्षणीय ठरली आहे. नेतानिवडीची प्रक्रिया सुरळितपणे मार्गी लागावी यासाठी शहांवर जबाबदारी सोपवण्यात आल्याचे मानले जात आहे.
