Marathi artist Death : महाराष्ट्राच्या लोककलेचा बुलंद आवाज हरपला; ज्येष्ठ कलावंत काळाच्या पडद्याआड, ‘आर्यभूषण’चा आधारवड कोसळला

Marathi artist Death : महाराष्ट्राच्या लोककला क्षेत्रावर शोककळा पसरवणारी दुःखद बातमी समोर आली आहे. ज्येष्ठ तमाशा कलावंत अमन तांबे यांचे निधन झाले असून त्यांच्या जाण्याने लोककलेचा एक बुलंद आवाज कायमचा हरपला आहे.

वयाच्या ६६व्या वर्षी त्यांनी अखेरचा श्वास घेतला. अल्पशा आजाराने त्यांचे निधन झाले. त्यांच्या पश्चात पत्नी, दोन मुले आणि एक विवाहित मुलगी असा परिवार आहे.

अमन तांबे हे तमाशा आणि लोकनाट्य क्षेत्रातील एक मानाचे नाव होते. आपल्या दमदार आवाज, प्रभावी अभिनय आणि सशक्त सादरीकरणामुळे त्यांनी प्रेक्षकांच्या मनावर अधिराज्य गाजवले. विशेषतः ग्रामीण भागात लोककलेचा प्रसार करण्यात त्यांचे मोठे योगदान होते. Marathi artist Death

त्यांच्या कलाकृतींमधून समाजातील विविध विषय, परंपरा आणि संस्कृती यांचे जिवंत चित्रण दिसून येत असे. तमाशा या पारंपरिक कलेसाठी त्यांनी संपूर्ण आयुष्य समर्पित केले. तसेच अनेक नवोदित कलाकारांना मार्गदर्शन करत त्यांनी पुढील पिढी घडवली. (Marathi artist Death)

पुण्यातील आर्यभूषण थिएटरचे संचालक म्हणून त्यांनी काम पाहिले आहे. अमन तांबे पुणेकर सह सरस्वतीबाई कोल्हापूरकर या नावाने त्यांचा तमाशा फड होता. पाच तोफांची सलामी, आईचं काळीज, दख्खनचा मराठा, ही त्यांची गाजलेली वगनाट्ये आहेत. त्यांची संताजी घोरपडे वगनाट्यातील औरंगजेबाची भूमिका खूपच गाजली होती.

त्यांच्या निधनाची बातमी समोर येताच कला आणि सांस्कृतिक क्षेत्रातून हळहळ व्यक्त केली जात आहे. कलाकार, चाहते आणि तमाशा प्रेमींनी त्यांना श्रद्धांजली अर्पण केली आहे. त्यांच्या जाण्याने लोककलेच्या क्षेत्रात मोठी पोकळी निर्माण झाली असून ती भरून काढणे कठीण असल्याची भावना व्यक्त होत आहे.

अमन तांबे यांचे आयुष्य हे लोककलेसाठी वाहिलेल्या समर्पणाचे प्रतीक होते. त्यांच्या आठवणी आणि त्यांनी दिलेली कलात्मक परंपरा पुढील पिढ्यांसाठी प्रेरणादायी ठरणार आहे.