Pickup Tempo Accident : अलिबाग तालुक्यात नमाज अदा करण्यासाठी जात असताना भीषण रस्ते अपघात झाला आहे. 21 जणांना घेऊन जाणारा पिकअप टेम्पो पलटी झाल्यामुळे एकाचा जागीच मृत्यू झाला असून 20 जण जखमी झाले आहेत. या घटनेमुळे परिसरात मोठी खळबळ उडाली आहे. ही दुर्घटना बोरघर पुलाजवळ जवळ घडली. याबाबत मिळालेल्या माहितीनुसार, गेल कंपनीत काम करणारे काही कामगार नमाज अदा करण्यासाठी रामराज येथे जात होते. यावेळी त्यांना घेऊन जाणाऱ्या पिकअप टेम्पोवरील चालकाचे नियंत्रण सुटल्याने वाहन रस्त्यावर पलटी झाले. या वाहनामध्ये एकूण 21 जण प्रवास करत होते. अपघातात एका व्यक्तीचा जागीच मृत्यू झाला, तर उर्वरित 20 जण जखमी झाले आहेत. अपघाताची माहिती मिळताच स्थानिक नागरिक आणि पोलिसांनी घटनास्थळी धाव घेत तातडीने मदतकार्य सुरू केले. जखमींना उपचारासाठी अलिबाग येथील जिल्हा रुग्णालयात दाखल करण्यात आले असून काही जणांची प्रकृती गंभीर असल्याची माहिती समोर आली आहे. या घटनेचा पुढील तपास पोलीस करत आहेत.