Ajit Pawar – राष्ट्रवादी काँग्रेसचे अध्यक्ष अजित पवार यांनी सहाव्यांदा राज्याच्या उपमुख्यमंत्रिपदाची शपथ घेतली. हा अनोखा विक्रमच आहे. अजित पवार यापूर्वी पृथ्वीराज चव्हाण (2 वेळा), देवेंद्र फडणवीस (2 वेळा), उद्धव ठाकरे आणि एकनाथ शिंदे यांच्या मुख्यमंत्रिपदाच्या कार्यकाळात ते उपमुख्यमंत्री झाले आहेत.
अजित पवारांना विधानसभा निवडणुकीत बारामतीत निवडून येणे कठीण जाईल, अशी चर्चा सुरु होती. मात्र सलग आठव्यांदा मोठ्या मताधिक्याने अजित पवार निवडून आले आहेत आणि उपमुख्यमंत्री देखील बनले.
राष्ट्रवादी काँग्रेसमध्ये फुट पडल्यानंतर पहिल्यांदाच विधानसभा निवडणूक झाली. या निवडणुकीत अजित पवार यांच्या पक्षाची कामगिरी साधारण असेल असा अनेक राजकीय विश्लेषकांचा समज होता.
पण, अजित पवार यांनी या सर्वांना मोडित काढले. त्यांच्या नेतृत्त्वाखालील राष्ट्रवादी काँग्रेसने 41 जागा जिंकल्या. तर, शरद पवार यांच्या पक्षाला फक्त 10 जागा मिळाल्या. अजित पवारांनी 1991 साली पहिल्यांदा लोकसभेची निवडणूक लढवली आणि ते बारामतीचे खासदार बनले.
त्याचवर्षी राजीव गांधी यांच्या हत्येनंतर केंद्रातील बदललेल्या परिस्थितीमध्ये शरद पवार केंद्रीय संरक्षण मंत्री झाले. त्यानंतर शरद पवारांनी राजीनामा दिलेल्या जागेवर अजित पवार पहिल्यांदा बारामती विधानसभा मतदारसंघातून निवडून आले.
त्यानंतर सातत्याने ते बारामती विधानसभा मतदारसंघातून निवडून येत आहे. अजित पवारांना राज्य मंत्रिमंडळात अनेक महत्त्वाचे मंत्रिपदे भूषवली आहे. काम करण्याची पद्धत आणि प्रशासनावरची पकड या त्यांच्या जमेच्या बाजू समजल्या जातात.
अजित पवार 1991 साली पहिल्यांदा मंत्री झाले. त्यानंतर 1995 ते 99, 2014 ते 19 आणि 2022 ते 23 हा कालावधी सोडला तर अन्य सर्व काळ ते मंत्री आहे. गेल्या तीन दशकात इतका कालावधी मंत्रिपद भुषविणारे अजित पवार हे राज्यातील एकमेव नेते असावे.
सरकारमध्ये असताना अजित पवारांना अर्थमंत्री, जलसंपदामंत्री, ग्रामविकास मंत्री अशा महत्वाच्या मंत्रिपदांचा कारभार पाहिला आहे. पुण्याचे पालकमंत्री म्हणूनही त्यांनी काम पाहिलं आहे. महाविकास आघाडीचे सरकार गेल्यानंतर एक वर्ष ते विधानसभेतील विरोधी पक्षनेते होते.
