Ajit Pawar: राज्याचे उपमुख्यमंत्री अजित पवार यांच्या दुर्दैवी निधनाच्या बातमीने संपूर्ण महाराष्ट्र हादरला आहे. बारामती येथे झालेल्या विमान अपघातात त्यांचे निधन झाले. या घटनेनंतर राजकीय, सामाजिक क्षेत्रासह मराठी मनोरंजन विश्वातूनही तीव्र हळहळ व्यक्त केली जात आहे. ‘बिग बॉस मराठी’च्या पाचव्या पर्वाचा विजेता सूरज चव्हाण यानेही सोशल मीडियावर भावनिक पोस्ट शेअर करत अजित पवारांना श्रद्धांजली वाहिली आहे. सूरज हा बारामतीच्या मोढवे गावचा रहिवासी आहे. बिग बॉससारखा मोठा शो जिंकल्यानंतर अजित पवार यांनी सूरजला स्वतःचं हक्काचं घर बांधून देण्याचं वचन दिलं होतं. पुढे अवघ्या एका वर्षात सूरज त्याच्या नव्या घरात राहायला गेला होता. विशेष म्हणजे घराचं बांधकाम सुरू असताना अजित पवार स्वतः प्रत्यक्ष ठिकाणी उपस्थित राहिले होते. अजित पवारांचा फोटो शेअर करत सूरज चव्हाणने पोस्टमध्ये लिहिलं, “माझा आनंद हरपला…” या काही शब्दांतूनच त्याचं दुःख व्यक्त होत आहे. अजित पवारांच्या पाठिंब्यामुळे आयुष्यात मोठा बदल घडल्याची भावना सूरजच्या पोस्टमधून दिसून येते. Ajit Pawar दरम्यान, अजित पवार यांच्या अकाली जाण्याने राज्यभर शोककळा पसरली असून कलाकार, नेते आणि सर्वसामान्य नागरिकांकडून श्रद्धांजली अर्पण केली जात आहे. अपघाताचं नेमकं कारण शोधण्यासाठी नागरी विमान वाहतूक विभागाकडून चौकशी सुरू असून, खराब हवामान आणि तांत्रिक बिघाडामुळे हा अपघात झाला असावा, अशी प्राथमिक माहिती समोर आली आहे.