मुंबई – बॉलिवूड अभिनेत्री कंगना राणावत महाराष्ट्राचे मुख्यमंत्री एकनाथ शिंदे यांची भेट घेणार असलयाचे वृत्त समोर आले आहे.या आधी कंगनाने शिवसेनेला केलेला विरोध संपूर्ण महाराष्ट्राला ज्ञात आहे. अशात कंगना आणि मुख्यमंत्री शिंदे यांच्या होणाऱ्या भेटीबाबत राजकीय वर्तुळात आता अनेक चर्चांना उधाण आले आहे.
राज्यात महाविकास आघाडीचे सरकार असताना कंगनाने शिवसेनेशी केलेला संघर्ष संपूर्ण देशाने पहिला. बीएमसीने कंगनाच्या मुंबईतील खार येथील कार्यालयावर हातोडा मारला होता. त्यानंतर कंगनानेही ट्विटरवरून शिवसेनेवर जोरदार हल्ला चढवला.यावेळी कंगनाने थेट उद्धव ठाकरेंना घमंडी म्हणत जोरदार टीका केली होती. त्यानंतर आता मुख्यमंत्री एकनाथ शिंदे यांच्याशी कंगनाची भेट होणार आहे. त्यामुळे या बैठकीत नेमकी काय चर्चा होणार याकडे सर्वांचे लक्ष असणार आहे.
आता मुख्यमंत्री शिंदे उद्धव ठाकरेंच्या नेतृत्वाविरोधात बंड करून भाजपसोबत सरकार चालवत आहेत. अशा स्थितीत कंगना सीएम शिंदे यांच्या भेटीचे अनेक अर्थ काढले जात आहेत. ही सदिच्छा भेट असे वर्णन केले जात असले तरी याची जोरदार चर्चा सध्या सुरु आहे. ही बैठक उद्या म्हणजेच शनिवार,१ ऑक्टोबर सायंकाळी मुख्यमंत्र्यांच्या वर्षा बंगल्यावर होणार असलयाचे समजते. राज्यात सत्ताबदल झाल्यानंतर कंगना पहिल्यांदाच मुख्यमंत्री शिंदे यांची भेट घेत आहे.
