खडकवासला(प्रतिनिधी) – हवेली पोलीस ठाण्यातील प्रभारी सनदी पोलीस अधिकारी तेगबीरसिंह संधु यांच्या धडाकेबाज कारवाईमुळे अनेक अवैध धंद्यांना आळा बसण्यास सुरुवात झाली आहे. गोऱ्हे बुद्रुक येथे दोन ठिकाणी केलेल्या कारवाईत अवैध दारू जप्त करण्यात आली. असून दोन जणांना अटक करण्यात आली आहे. यामध्ये सुमारे दहा हजार रुपये किमतीची जप्त केलेली दारू नष्ट करण्यात आली आहे.
गोऱ्हे बुद्रुक येथील पंचशील नगर आणि गोल्डन लॉजच्या पाठीमागे असलेल्या अवैध दारू विक्रीच्या धंद्यावर कारवाई केली दोन्ही ठिकाणी मिळून आलेली सुमारे दहा हजार रुपये किमतीची गावठी दारू जप्त करून नष्ट करण्यात आल्याची माहिती सनदी अधिकारी संधु यांनी दिली.
गोल्डन लॉज जवळील अवैध दारू विक्रीच्या दाखल केलेल्या गुन्ह्यात नंदू यशवंत ओव्हाळ आणि पंचशीलनगर येथील दाखल केलेल्या गुन्ह्यात संजय जगताप (दोघेही रा. गोऱ्हे बुद्रुक, ता. हवेली) यांना अटक करण्यात आली आहे. तर संतोष दत्तात्रय पायगुडे (रा. गोळेवाडी), शाहीद शेख (रा. डोणजे), वैभव खिरिड (रा. गोऱ्हे बुद्रुक) यांच्यावर गुन्हा दाखल करण्यात आला आहे. पुढील तपास सहायक पोलीस निरीक्षक नितीन नम करत आहेत.
