सीटबेल्ट न लावणाऱ्या 3358 आणि हेल्मेट न घालणाऱ्या 1913 जणांकडून दंड वसूल
पिंपरी : वाहतुकीला शिस्त लावण्यासाठी तसेच रस्त्यावरील अपघाती मृत्यूचे प्रमाण कमी करण्यासाठी पोलिसांनी कंबर कसली आहे. गेल्या 51 दिवसांमध्ये चारचाकी वाहन चालविताना सीटबेल्ट न लावणाऱ्या तीन हजार 358 जणांवर कारवाई केली. तर दुचाकी चालविताना हेल्मेट न वापरणाऱ्या एक हजार 913 चालकांवर कारवाईचा बडगा उगारण्यात आला आहे.
चारचाकी मोटारीतील प्रवाशांनी सीटबेल्ट न वापरल्यामुळे व दुचाकीच्या अपघातामध्ये हेल्मेट न वापरल्यामुळे अनेकांचे जीव गेले आहेत. हे प्रमाण कमी करण्यासाठी वाहतूक पोलिसांनी मोठ्या प्रमाणात कारवाई करण्यास सुरवात केली आहे. 1 जानेवारी ते 20 फेब्रुवारी या 51 दिवसांच्या कालावधीत वाहतूक पोलिसांनी सीटबेल्ट न लावणाऱ्या तीन हजार 358 वाहन चालकांवर कारवाई करत या चालकांकडून सहा लाख 71 हजार 600 रुपयांचा दंड वसूल केला आहे.
हेल्मेट चालकांवर थेट कारवाई न करता त्यांनी एखाद्या नियमांचे उल्लंघन केल्यास त्या दंडासह हेल्मेट न घातले असल्यास त्याचाही दंड ठोठविण्यात आला. अशाप्रकारे गेल्या 51 दिवसात दुचाकीस्वारांकडून नऊ लाख 56 हजार 500 रुपयांचा दंड वूसल केल्याची माहिती वाहतूक पोलिसांनी दिली आहे.