नवी दिल्ली – उत्तर प्रदेशमधील हाथरस येथे दलित पीडितेवर सामूहिक बलात्कार झाला होता. त्यानंतर या नराधमांनी तिची जीभही कापली. या पीडितेवर एम्स रुग्णालयात उपचार सुरू होते, मात्र आज सकाळी पीडितेचा मृत्यू झाला. याच घटनेच्या पार्श्वभूमीवर अभिनेत्री कंगना राणावतने ट्विट करत संताप व्यक्त केलं आहे.
Shoot these rapists publicly, what is the solution to these gang rapes that are growing in numbers every year? What a sad and shameful day for this country. Shame on us we failed our daughters #RIPManishaValmiki
— Kangana Ranaut (@KanganaTeam) September 29, 2020
कंगनाने ट्विट केले आहे, ‘या सामूहिक बलात्काराच्या प्रकरणातील आरोपींना सार्वजनिकरित्या गोळ्या झाडायला हव्या, या दुष्कर्मांचे निराकरण काय आहे, ज्यांची संख्या दरवर्षी वाढत आहे? आजचा दिवस देशासाठी किती वाईट आणि लज्जास्पद आहेत. आम्हाला लाज वाटते कारण आम्ही आमच्या मुलींचे रक्षण करण्यात अयशस्वी झालो आहोत. #RIPManishaValmiki ‘
दरम्यान मिळालेल्या माहितीनुसार, चंदपा येथे राहणाऱ्या दलित तरुणीवर १४ सप्टेंबर रोजी सामूहिक बलात्कार झाला होता. आपल्या आईसोबत तरुणी शेतावर चारा गोळा करण्यासाठी गेली होती. त्याचवेळी तिच्यावर चार जणांनी सामूहिक बलात्कार केला. यानंतर आरोपींनी पीडितेचा गळा दाबून तिला ठार मारण्याचा प्रयत्न केला. तिने आरडाओरडा करताच आरोपींनी पीडितेची जीभ कापली. गंभीर अवस्थेत जखमी झालेल्या तरुणीवर एम्समध्ये उपचार सुरू होते, मात्र या पीडितेला वाचवण्यात डॉक्टरांना अपयश आले.
याप्रकरणाची पीडित मुलीच्या कुटुंबीयांनी पोलिसांना माहिती दिली. यानंतर पोलीस घटनास्थळी पोहोचले.
दरम्यान, 14 सप्टेंबर रोजी झालेल्या सामूहिक बलात्काराच्या प्रकरणात चारही आरोपींना अटक करण्यात आली असल्याचे हाथरसचे पोलीस अधीक्षक विक्रम वीर यांनी सांगितले होते.