पुणे : करोनाच्या संभाव्य तिसऱ्या लाटेत बालकांना संसर्गाचा धोका असल्याचे सांगितले जात आहे. त्यामुळे उपाययोजना करताना पालकांच्या निवासाचाही विचार जिल्हा आणि महापालिका प्रशासनाला करावा लागणार आहे.
करोनाचा बालकांना धोका असल्याचे भाकित करण्यात आले आहे. त्यादृष्टीनेच देश, राज्य आणि स्थानिक स्वराज्यसंस्था पातळीवर लहान मुलांच्या आरोग्यासंबंधीची उपाययोजना करण्यासाठी “टास्कफोर्स’ची स्थापना करण्यात आली. त्यामध्ये शहरातील बालरोगतज्ज्ञांचा समावेश करण्यात आला.
सध्या शहरात विविध खासगी रुग्णालयांमध्ये आणि सरकारी रुग्णालयांमध्ये करोना बाधित बालकांवर उपचार केले जात आहेतच. त्यांच्यासाठी स्वतंत्र चाइल्ड केअर वॉर्डदेखील अनेक ठिकाणी सुरू केला आहे. ससूनमध्येही अशाप्रकारचा स्वतंत्र वॉर्ड आधीपासूनच कार्यान्वित करण्यात आला आहे. सरकारी सह खासगी रुग्णालयात देखील लहानमुलांचा अतिदक्षता विभागही कार्यान्वित आहे.
मात्र, संभाव्य धोका डोळ्यांपुढे ठेवून आणि बाधित बालकांची संख्या वाढली, तर आधी तयारी हवी यासाठी तरतूद करावी लागणार आहे.आजपर्यंत जे बाधित रुग्ण राहिले आहेत, त्यांच्याजवळ नातेवाईकांना राहण्याची व्यवस्था नव्हती. तसेच त्यांच्याशी केवळ मोबाइलवरच किंवा व्हिडिओ कॉलिंगद्वाराच बोलता येत होते.
परंतु शून्य ते 10 वर्षे वयोगटातील बालके पूर्णपणे पालकांवर अवलंबून असतात. त्यामुळे या बाधितांना दाखल करून घेताना त्यांच्या पालकांनाही तेथेच राहण्याची, जेवण्याची व्यवस्था करावी लागणार आहे.
दृष्टीने प्रशासकीय पातळीवर तयारी सुरू असल्याचे सांगण्यात आले. करोनाचा संभाव्य धोका लक्षात घेता, लहान मुलांच्या आरोग्याच्या उपाययोजनांवर विचार सुरू आहे. लवकरच यासंदर्भात गाइडलाइन्स तयार केल्या जातील.
– डॉ. संजय नातू, अध्यक्ष, “इंडियन ऍकॅडमी ऑफ पेडियॅट्रिक’ (आयएपी)
बाधित बालकांच्या पालकांची काय व्यवस्था असेल, यावर प्रशासकीय प्रक्रिया सुरू आहे. लेखी गाइडलाइन्स तयार कराव्या लागणार आहेत. गेल्या वर्षभरापासून आम्ही बाधित लहानग्यांवर उपचार करत आहोतच. आई किंवा वडील त्यांच्याबरोबर राहतातच. ससूनमध्ये 200 पेक्षा जास्त बालकांना आम्ही उपचार केले आहेत. बाळाबरोबर शक्यतो आईच असते. ती बाळासाठी सुरक्षेच्या नियमांचे पालन करतेच. तरीही त्यांना एन-95 मास्क दिले जातात. सतत हात धुण्यासंबंधीच्या सूचना अन्य सुरक्षेविषयीच्या सूचना दिल्या जातात. त्यांच्या जेवणाचीही सोय केली जाते. आता मोठ्या प्रमाणात उपाययोजना करताना त्याच्या गाइडलाइन्स तयार कराव्या लागणार आहेत ज्या सर्वसमावेशक असतील.
– डॉ. आरती किणीकर, बालरोग विभागप्रमुख, ससून रुग्णालय