मुंबई – पेट्रोलच्या किमती दिवसेंदिवस वाढत असून सर्वसामान्य नागरिकांना पेट्रोल परवडत नाही. 102 रुपये दराने पेट्रोलची विक्री होत आहे. इंधनाचे दर नियंत्रणात आणण्याची मागणी होत आहे. तसेच सर्व स्तरातून इंधन दरवाढीचा निषेध व्यक्त केला जात आहे. तरी देखील केंद्र सरकारला जाग येत नाही. याच दरम्यान राज्याचे पर्यावरणमंत्री आणि युवासेनाप्रमुख आदित्य ठाकरे यांच्या वाढदिवसानिमित्त डोंबिवलीत युवासेनेच्या कार्यकर्त्यांकडून माफक दरात पेट्रोल वाटप केले जात आहे. त्यामुळे डोंबिवलीकरांची चांगलीच चांदी झाली आहे.
डोंबिवलीच्या उस्मा पेट्रोल पंपावर अवघ्या एका रुपयात 1 लीटर पेट्रोल दिले जात आहे. सध्या मुंबईसह राज्यातील बहुतांश शहरात पेट्रोलचा प्रतिलीटर दर 100 रुपयांच्या पलीकडे गेला आहे. त्यामुळे हे स्वस्त पेट्रोल घेण्यासाठी पेट्रोल पंपाबाहेर दुचाकीच्या रांगा लागल्या होत्या.
युवासेना गल्लीगल्लीत पोहोचली पाहिजे – आदित्य ठाकरे
येत्या दोन वर्षांमध्ये युवासेना ही गल्लीगल्लीत पोहोचली पाहिजे, असे आदेश राज्याचे पर्यावरणमंत्री आणि युवासेनाप्रमुख आदित्य ठाकरे यांनी कार्यकर्त्यांना दिले आहेत. शिवसेना आमदार मंगेश कुडाळकर यांनी रविवारी यासंदर्भात भाष्य केले. यावेळी त्यांनी मिठी नदीवरुन सत्ताधारी शिवसेनेवर आरोप करणाऱ्या विरोधकांनाही प्रत्युत्तर दिले. विरोधक हे विनाकारण राजकारण करत आहेत. त्यांनी राजकारण न करता संकटकाळात एकत्र येऊन काम करावे, असे मंगेश कुडाळकर यांनी म्हटले.
मुंबईत युवासेनेकडून मोफत कोरोना लस
आदित्य ठाकरे यांच्या वाढदिवसानिमित्त शिवसेना खासदार राहुल शेवाळे यांनी युवासेनेच्या कार्यकर्त्यांना मोफत लस देण्याचा उपक्रम आयोजित केला होता. यावेळी अनेक कार्यकर्त्यांनी कोरोना लस टोचून घेतली.