पुणे : सराईताने तरुणावर कोयत्याने वार केल्याची घटना वारजे भागात घडली. याप्रकरणी पोलिसांनी एकाला अटक केली आहे. नागेश आनंदा वांजळे (३४, रा. गणपती माथा, वारजे) असे जखमी झालेल्याचे नाव आहे. वांजळे याच्या खुनाचा प्रयत्न केल्याप्रकरणी चांगदेव उर्फ पप्पू अशोक वांजळे (३७, रा. देवगिरी काॅलनी, गणपती माथा, वारजे) याला अटक करण्यात आली.
याप्रकरणी नागेश वांजळे यांची आई कमल (५८) यांनी वारजे माळवाडी पोलिसांत फिर्याद दिली आहे. पोलिसांनी दिलेल्या माहितीनुसार, नागेश आणि आरोपी चांगदेव यांच्यात वाद झाला होता.
चांगदेवची पार्श्वभूमी गुन्हेगारी असून, त्याच्याविरुद्ध यापूर्वी विश्रामबाग पोलिसांत गुन्हा दाखल झाला होता. रविवारी रात्री साडेअकराच्या सुमारास नागेश ते राहात असलेल्या इमारती जवळ थांबले असता, चांगदेव तेथे आला.
त्याने नागेश यांच्याशी वाद घालून शिवीगाळ केली. आरोपीने त्यांना मारहाण करून कोयत्याने वार केले. पोलीस उपनिरीक्षक सुनील जगदाळे तपास करत आहेत.