नवी दिल्ली : देशभरात आज स्वातंत्र्याचा अमृत महोत्सव साजरा करण्यात येत आहे. गुगुलनेही डुडल बनवून भारताच्या स्वातंत्र्याच्या जल्लोषात सहभाग घेतला आहे. नागरिक आकाशात उंच पतंग उडवतानाचे हे डुडल गुगुलने बनवले आहे. आकाशातील उंच उडणाऱ्या पतंग भारताने गाठलेल्या उंचीचे प्रतिक असल्याचे हे डुडल आहे. केरळचे कलाकार निथी यांनी ही कलाकृती साकारली आहे. पतंगांच्या माध्यमातून भारताच्या संस्कृतीचे चित्रण या डुडलमध्ये करण्यात आले आहे.
सर्व स्तरातील लोक एकत्र येऊन पतंग बनवत असल्याचे या कलाकृतीमध्ये दाखवण्यात आले आहे. भारतातील सर्व सण-उत्सव सर्वधर्मीय एकत्र येत साजरे करतात हे यातून अधोरेखित करण्याचा कलाकाराचा प्रयत्न आहे. भारताच्या स्वातंत्र्याचे प्रतिक म्हणून देशात अनेक ठिकाणी पतंग उडवण्याची परंपरा आहे. स्वातंत्र्य लढ्यात भारतीय क्रांतीकारकांनी ब्रिटिश राजवटीविरोधात निषेधाचा संदेश असलेल्या पतंगी उडवल्या होत्या. तेव्हापासून स्वातंत्र्यदिनी स्पर्धात्मक आणि मनोरंजक पतंग उडवण्याची परंपरा आजतागायत कायम आहे.
देशाच्या स्वातंत्र्याला ७५ वर्ष पूर्ण झाल्याच्या निमित्ताने देशात केंद्र सरकारकडून स्वातंत्र्याचा ‘अमृत महोत्सव साजरा’ करण्यात येत आहे. ‘हर घर तिरंगा’ या अभियानाला देखील देशात मोठा प्रतिसाद मिळत आहे.
दिल्लीतील लाल किल्यावर आज सकाळी साडेसात वाजता पंतप्रधान नरेंद्र मोदी यांनी ध्वजारोहण केले. यावेळी पहिल्यांदाच स्वदेशी तोफांची सलामी देण्यात आली. त्यानंतर पंतप्रधानांनी देशवासियांना संबोधित केले.