FIFA World Cup 2026: अभिनेत्री आणि नृत्यांगना नोरा फतेही पुन्हा एकदा चर्चेत आली आहे. फीफा वर्ल्ड कप २०२६साठी तयार करण्यात आलेले तिचे नवीन गाणे ‘Siir Siir’ नुकतेच प्रदर्शित झाले असून या गाण्याला प्रेक्षकांचा जबरदस्त प्रतिसाद मिळत आहे. रिलीज झाल्यानंतर अवघ्या १८ तासांत या गाण्याला ६.१ दशलक्ष म्हणजेच ६१ लाखांहून अधिक व्ह्यूज मिळाले आहेत.

‘Siir Siir’ हे गाणे फीफा वर्ल्ड कप २०२६च्या अधिकृत संगीत प्रकल्पाचा भाग आहे. हे गाणे स्पर्धेच्या अधिकृत अल्बममध्येही समाविष्ट करण्यात आले आहे. या प्रकल्पासाठी जगभरातील विविध संगीत परंपरा आणि संस्कृतींशी संबंधित कलाकारांना एकत्र आणण्यात आले आहे. प्रसिद्ध संगीत निर्माता संजय आणि फ्रेंच गायक वेजड्रीम यांच्या सहकार्याने हे गाणे तयार करण्यात आले आहे.

या गाण्याच्या यशामुळे नोरा फतेहीच्या चाहत्यांमध्ये उत्साहाचे वातावरण आहे. सोशल मीडियावरही या गाण्याची मोठ्या प्रमाणावर चर्चा सुरू आहे. अनेकांनी या गाण्याचे कौतुक करत ते फीफाच्या आतापर्यंतच्या सर्वोत्तम गाण्यांपैकी एक असल्याचे म्हटले आहे.

 

View this post on Instagram

 

A post shared by FIFA World Cup (@fifaworldcup)

याशिवाय, नोरा फतेही १२ जून रोजी कॅनडातील टोरोंटो येथील बीएमओ फील्ड स्टेडियममध्ये होणाऱ्या फीफा वर्ल्ड कप २०२६च्या उद्घाटन सोहळ्यातही सादरीकरण करणार आहे. यापूर्वी कतार वर्ल्ड कपदरम्यानही तिने एका विशेष फॅन इव्हेंटमध्ये सहभाग घेतला होता. त्यामुळे फीफासोबतचा तिचा हा आणखी एक महत्त्वाचा टप्पा मानला जात आहे.

गाण्याबाबत बोलताना नोरा फतेहीने सांगितले की, ‘Siir Siir’ हा प्रकल्प तिच्यासाठी खूप खास आहे. विविध संस्कृतींचा संगम दाखवण्याचा प्रयत्न या गाण्यात करण्यात आला आहे. जागतिक स्तरावर पोहोचताना स्वतःची ओळख आणि वैशिष्ट्य कायम ठेवणे हा या गाण्यामागील मुख्य उद्देश असल्याचे तिने सांगितले.

नोरा म्हणाली की, तिच्या मोरोक्को आणि कॅनडातील मूळांबरोबरच भारत आणि दक्षिण आशियाई संस्कृतीचाही तिच्या प्रवासावर मोठा प्रभाव आहे. त्यामुळे या सर्व घटकांचा समावेश या गाण्यात करण्याचा प्रयत्न करण्यात आला आहे.

FIFA World Cup 2026: Nora Fatehi

तिने या प्रकल्पातील भारतीय योगदानाचाही विशेष उल्लेख केला. या गाण्याच्या निर्मितीत भारतीय कोरिओग्राफर, नृत्य कलाकार आणि स्टायलिंग टीमने महत्त्वाची भूमिका बजावल्याचे तिने सांगितले. त्यामुळे हा प्रकल्प तिच्यासाठी अधिक अर्थपूर्ण ठरल्याचे नोरा म्हणाली.

दरम्यान, नोरा फतेही अलीकडे एका गाण्यावरील वादामुळेही चर्चेत होती. एका गाण्यात महिलांचे चित्रण आक्षेपार्ह पद्धतीने करण्यात आल्याचा आरोप तिच्यावर करण्यात आला होता. या प्रकरणावर स्पष्टीकरण देताना तिने कोणाच्याही भावना दुखावण्याचा हेतू नसल्याचे स्पष्ट केले होते. तसेच संबंधित गाण्याचे काही भाग तिच्या माहितीसह तयार झाले नसल्याचा दावाही तिने केला होता.

सध्या मात्र ‘Siir Siir’च्या यशामुळे नोरा फतेही पुन्हा एकदा आंतरराष्ट्रीय स्तरावर चर्चेत आली आहे. फीफा वर्ल्ड कपसारख्या प्रतिष्ठित मंचावर भारतीय प्रतिनिधित्व दिसत असल्याने तिचे चाहतेही आनंद व्यक्त करत आहेत.