नगर – सोशल मीडियावर ओळख झालेल्या अनोळखी व्यक्तीकडे शेअर ट्रेडिंगमध्ये गुंतवणूक केल्याने नगरमधील नोकरदाराची ३० लाख रुपयांची फसवणूक झाल्याचा प्रकार पुढे आला आहे. याबाबत सायबर पोलीस ठाण्यात एका व्हाॅट्सअप नंबर धारक अनोळखी व्यक्तीविरोधात गुन्हा दाखल करण्यात आला आहे. फसवणूक झालेली व्यक्ती आनंदनगर गुलमोहर रस्ता, सावेडी येथील आहे.
सदरचा प्रकार हा १६ जानेवारी २०२४ ते १७ फेब्रुवारी दरम्य़ान घडला आहे. फिर्यादी यांना शेअर ट्रेडिंगमध्ये गुंतवणूक करायची असल्याने ते सोशल मीडियावरील इंस्टाग्रामवर माहिती घेत असतांना त्यांची एका अनोळखी व्यक्तीसोबत ओळख झाली.
त्या व्यक्तीने फिर्यादीसोबत व्हाॅट्स अप नंबरवर संपर्क केला. शेअर ट्रेडिंगमध्ये गुंतवणूक केल्यास अधिक नफा मिळवून देण्याचे अमिष दाखवले. फिर्यादीने सुरुवातीला २० लाख व नंतर १० लाख रुपये गुंतवणूकीसाठी दिले. त्यानंतर संबंधितांनी ना नफा दिला ना गुंतवणुकी केलेली रक्कम त्यामुळे फिर्यादीस आपली फसवणूक झाल्याचे लक्षात येताच त्यांनी सायबर पोलीस ठाण्यात गुन्हा दाखल केला.
