इम्फाळ : मणिपूरच्या जिरीबाम जिल्ह्यात सोमवारी केंद्रीय राखीव पोलीस दलाच्या जवानांशी झालेल्या चकमकीत अनेक दहशतवादी मारले गेले. कुकी अतिरेक्यांनी सीआरपीएफ कॅम्पवर हल्ला केला तेव्हा ही चकमक झाली. एका इंग्रजी माध्यमाने दिलेल्या बातमीनुसार चकमकीत ११ दहशतवादी मारले गेले असून एक सीआरपीएफ जवानही जखमी झाला आहे. त्याला उपचारासाठी हेलिकॉप्टरने रुग्णालयात पाठवण्यात आले आहे.
सोमवारी सकाळी मणिपूरच्या इम्फाळ पूर्व जिल्ह्यात दहशतवाद्यांनी डोंगराळ भागातून केलेल्या गोळीबारात एक शेतकरी जखमी झाला. कुकी अतिरेक्यांनी इम्फाळ खोऱ्यात सलग तिसऱ्या दिवशी शेतकऱ्यांवर हल्ला केला आहे. सुरक्षा दल तातडीने घटनास्थळी पोहोचले आणि त्यांनी प्रत्युत्तर दिले. यामध्ये एक छोटीशी चकमक झाली.
जखमी शेतकऱ्याला यंगंगपोकपी पीएचसी रुग्णालयात उपचारासाठी पाठवण्यात आले असून त्याची प्रकृती स्थिर आहे. दरम्यान, शनिवारी दुसऱ्या घटनेत, शेतात काम करत असताना एका 34 वर्षीय महिला शेतकऱ्याला गोळी लागली. चुरचंदपूर जिल्ह्यातील डोंगराळ भागात हा हल्ला झाला. या हल्ल्यामुळे परिसरातील तणाव आणखी वाढला आहे. रविवारी सणसबी, सबुनखोक खुन्नौ आणि थमनापोकपी भागात असेच हल्ले करण्यात आले.
मणिपूरमध्ये गेल्या वर्षी मे महिन्यापासून सुरू असलेल्या जातीय हिंसाचारामुळे दोनशेहून अधिक लोक मारले गेले आहेत आणि हजारो लोक त्यांच्या घरातून बेघर झाले आहेत. इम्फाळ खोऱ्यातील मेईती समुदाय आणि आसपासच्या डोंगराळ भागात स्थायिक झालेले कुकी समुदाय यांच्यात हा हिंसाचार सुरू आहे. मणिपूरमधील हिंसाचाराचा इतिहास जातीय आणि राजकीय संघर्षांशी जोडलेला आहे. राज्यातील कुकी, नागा आणि मेईतेई समुदायांमध्ये दीर्घकाळापासून तणाव आहे.
