बनावट सोने तारणप्रकरणी बडे मासे गळाला लागणार?

मुख्य आरोपीची न्यायालयीन कोठडीत रवानगी

चाकण -येथील नगर अर्बन को-ऑपरेटिव्ह बॅंकेच्या बनावट सोने तारण कर्ज प्रकरणातील मुख्य सूत्रधार सतीश शंकर अष्टेकर याला चाकण पोलिसांनी अटक केली असून खेड न्यायालयाने 2 जुलैपर्यंत न्यायालयीन कोठडी सुनावली आहे.आरोपीचा सर्व कर्ज प्रकरणाच्या फसवणुकीत प्रत्यक्ष हात असताना बॅंकेकडून आरोपीचा नामोल्लेख सुरुवातीपासूनच टाळण्यात आल्याने बॅंक अधिकाऱ्यांच्या एकंदरीत भूमिकेबाबत संशयाचे धुके गडद झाले आहे. तर याप्रकरणात आणखी काही बडे मासे गळाला लागण्याची शक्‍यता पोलिसांनी वर्तवली आहे.

चाकण येथील नगर अर्बन को-ऑपरेटिव्ह बॅंकेच्या बनावट सोने तारणाच्या कथित फसवणुकीच्या प्रकरणी चाकण पोलिसांत बॅंकेचे चाकण शाखाधिकारी किसन काथवटे यांनी दिलेल्या फिर्यादीचे अनुषंगाने बनावट सोने तारण ठेवून कर्ज मिळवल्याप्रकरणी बॅंकेच्या व्हॅल्युअरसह एकूण 14 जणांवर फसवणुकीचा गुन्हा दाखल करण्यात आला होता.

या गुन्ह्याच्या पार्श्‍वभूमीवर बॅंकेचे व्हॅल्युअर विवेक माळवे व इतर कर्जदारांनी खेड सत्र न्यायालयात अटकपूर्व जामीनसाठी धाव घेतली होती. याप्रकरणी सत्र न्यायाधीश एन. के. ब्रह्मे यांनी बॅंक व्हॅल्युअरसह काही कर्जदारांना दिनांक 8 एप्रिल 2019 च्या आदेशान्वये अटकपूर्व जामीन मंजूर केला होता. या गुन्ह्याची पाळेमुळे शोधून काढण्याकरिता चाकण पोलिसांनी सर्व आरोपींकडे कसून तपास केला असता विवेक माळवे यांचा कर्मचारी सतीश शंकर अष्टेकर हा मुख्य सूत्रधार असल्याचे निष्पन्न होताच पोलिसांनी त्याला अटक केली. आरोपी 15 जून पासून पोलीस कोठडीत होता. खेड न्यायालयाने आरोपीला 2 जुलै 2019 पर्यंत न्यायालयीन कोठडी सुनावली असून त्याची न्यायालयीन कोठडीत रवानगी करण्यात आली आहे. पोलीस उपनिरीक्षक संजय नीलपत्रेवार हे पुढील तपास करीत आहेत.

LEAVE A REPLY

Please enter your comment!
Please enter your name here

Enable Google Transliteration.(To type in English, press Ctrl+g)