दुरुस्तीचा प्रयत्न सुरू
पुणे – पेशवेपार्कमध्ये साहसी खेळांची झालेली दुरवस्था लक्षात घेता आता त्याची दुरुस्त करण्याचे काम महापालिकेने हाती घेतले आहे. पेशवेपार्कमध्ये साहसी उद्यान साकारण्यात आले आहे. त्यामध्ये सर्व वयोगटातील मुलांसाठी साहसीखेळ उपलब्ध करून देण्यात आले आहेत. मात्र, गेल्या काही महिन्यांपासून यातील बहुतांश खेळ बंद अवस्थेत आहेत. यातील काही बिघडले आहेत तर, काही ठिकाणी सुरक्षारक्षक किंवा प्रशिक्षक नसल्याने ते खेळ बंद ठेवण्यात आले आहेत.
याशिवाय जे खेळ खेळताना हेल्मेट लागणार आहे ते खेळही बंद ठेवण्यात आले आहेत. याचे कारण म्हणजे हेल्मेटच गायब झाल्याने ते खेळ खेळणे जोखमीचे ठरणारे आहे. यातील काही खेळण्यांची दुरुस्ती करण्याचे काम सुरू करण्यात आले आहे. नाताळच्या सुट्ट्या आणि हिवाळी सुट्टी लक्षात घेता ही दुरुस्ती लवकर करण्याचा प्रशासनाचा प्रयत्न आहे.