निर्देशांकांची घोडदौड चालूच,सलग दुसऱ्या आठवड्यात शेअर निर्देशांकांत वाढ

धातू आणि वाहन क्षेत्रांतील कंपन्या तेजीत

मुंबई  -भारतीय शेअर बाजारातील सकारात्मक वातावरण कायम आहे. त्यामुळे शुक्रवारीही शेअर बाजाराच्या निर्देशांकात वाढ झाली. शुक्रवारी मुंबई शेअर बाजाराचा निर्देशांक सेन्सेक्‍स 127 अंकांनी वाढून 38,672 अंकांवर बंद झाला. तर राष्ट्रीय शेअर बाजाराचा निर्देशांक निफ्टी 53 अंकांनी वाढून 11,623 अंकांवर बंद झाला.

आठवड्याच्या पातळीवरही सेन्सेक्‍समध्ये 508 अंकांची वाढ झाली तर निफ्टीमध्ये 167 अंकांची वाढ झाली. रुपया बळकट असल्यामुळे परदेशी संस्थात्मक गुंतवणूकदार भारतात गुंतवणूक करीत असल्यामुळे, त्याचबरोबर अमेरिका आणि चीनमधील व्यापार संघर्ष कमी होण्याची शक्‍यता असल्यामुळे शेअर बाजार निर्देशांक वाढत असल्याचे विश्‍लेषकांना वाटते.
यासंबंधात बोलताना जीओजी वित्तीय सेवा या संस्थेचे संशोधन प्रमुख विनोद नायर यांनी सांगितले की, एकूणच जागतिक बाजारात सकारात्मक वातावरण असल्यामुळे आणि रिझर्व्ह बॅंक व्याजदरात कपात करण्याची शक्‍यता असल्यामुळे दोन आठवड्यापासून शेअर बाजार निर्देशांकात वाढ होत आहे.

शुक्रवारी धातू क्षेत्राचा निर्देशांक 2.33 टक्‍क्‍यांनी आरोग्य क्षेत्राचा निर्देशांक 1.37 टक्‍क्‍यांनी तर वाहन क्षेत्राचा निर्देशांक 1.22 टक्‍क्‍यांनी वाढला. मात्र, नफेखोरीमुळे बॅंका आणि एफएमसीजी कंपन्यांच्या शेअरच्या भावात काही प्रमाणात घट झाली. गुरुवारी परदेशी संस्थात्मक गुंतवणूकदारांनी तब्बल 3594 कोटी रुपयांच्या शेअरची खरेदी केली. मात्र देशातील संस्थागत गुंतवणूकदारांनी 2080 कोटी रुपयांच्या शेअरची विक्री केली. शुक्रवारी दुपारी रुपयाच्या मूल्य 13 पैशांनी वाढले होते.

LEAVE A REPLY

Please enter your comment!
Please enter your name here

Enable Google Transliteration.(To type in English, press Ctrl+g)