फिनआयक्यू करंडक राज्य मानांकन टेनिस स्पर्धा
पुणे – मुलांच्या गटात नील केळकर, अयान शेट्टी यांनी, तर मुलींच्या गटात रित्सा कोंडकर या खेळाडूंनी मानांकित खेळाडूंचा पराभव करत येथे होत असलेल्या नवनाथ शेटे स्पोर्टस अकादमी यांच्या तर्फे आयोजित एमएसएलटीए यांच्या मान्यतेखाली होत असलेल्या फिनआयक्यू करंडक एमएसएलटीए राज्य मानांकन 10 वर्षाखालील टेनिस स्पर्धेच्या उपांत्यफेरीत प्रवेश केला.
मेट्रोसिटी स्पोर्टस क्लब, आयडियल कॉलनी, कोथरूड येथील टेनिस कोर्ट येथे सुरु असलेल्या या स्पर्धेत उपांत्यपूर्व फेरीत 10 वर्षाखालील मुलांच्या गटात बिगरमानांकित पुण्याच्या नील केळकर याने अव्वल मानांकित दिवीज पाटीलचा 6-2 असा पराभव करून सनसनाटी निकालाची नोंद केली. पाचव्या मानांकित अयान शेट्टी याने तिसऱ्या मानांकित ओम वर्माचा 6-4 असा संघर्षपूर्ण पराभव करून उपांत्य फेरी गाठली. दुसऱ्या मानांकित द्रोण सुरेश याने सातव्या मानांकित आयुश पुजारीचा टायब्रेकमध्ये 6-5(5) असा पराभव केला.
मुलींच्या गटात रित्सा कोंडकर हिने अकराव्या मानांकित अनन्या दलालचा 6-0 असा पराभव केला. चौथ्या मानांकित प्रिशा शिंदे हिने पाचव्या मानांकित काव्या देशमुखचा 6-2 असा पराभव केला. दुसऱ्या मानांकित मेहक कपूरने सहाव्या मानांकित वरंदीका राजपूतवर टायब्रेकमध्ये 6-5(5) असा विजय मिळवला. तिसऱ्या मानांकित मृणाल शेळके हिने सातव्या मानांकित ह्रितिका खपलेचा 6-3 असा पराभव करून उपांत्य फेरीत धडक मारली.