करोनामुळे क्रिकेटपटूंवर येणार बंधने; स्विंगचे अव्हान
मुंबई – जागतिक स्तरावर विविध खेळांत खेळाडूंना हाताचा, पायाचा तसेच तोंडातून सुटणाऱ्या लाळेसह घामाचा वापर करण्याच्या सवयी असतात. क्रिकेटबाबत बोलायचे झाले तर एखाद्या सामनन्यात चेंडू जेव्हा जुना होतो तेव्हा त्याच्यावर लाळ लावून त्याची चकाकी आणली जाते. करोनामुळे खेळाडूंना या व अशा कितीतरी सवयी सोडाव्या लागणार आहेत.
सामन्यात नवा चेंडूने खेळ सुरू होतो तेव्हा त्याला कपड्यांवर तसेच ट्राउजरवर घासले जाते व त्याची एक बाजूची चकाकी घालविली जाते. चेंडू जास्त स्विंग व्हावा यासाठी हा खेळ केला जातो. तसेच चेंडू जेव्हा जुना होतो तेव्हा ही एका बाजूची चकाकी कायम राहावी यासाठी खेळाडू चेंडूची चकाकी टिकवून ठेवण्यासाठी लाळ किंवा घाम लावतात व चेंडू एका बाजूने थोडा ओलसर व्हावा. असे केल्याने चेंडू थोडा जडही होतो व वेगवान गोलंदाजांना चेंडू स्विंग किंवा रिव्हर्स स्विंग करणे सोपे ठरते. मात्र, आता करोनाचा धोका संपुष्टात आला तरीही पुढील काही काळ खेळाडूंना ही सवय सोडावी लागणार आहे.
करोना विषाणूंचा प्रसार खोकला, शिंक, लाळ आणि घाम यांच्यामुळे जास्त पसरतो. त्यामुळे हा धोका पत्करण्यास एकही खेळाडू तयार होणार नाही. त्यामुळे येत्या काही काळात चेंडू उष्टा केला जाणार नाही. त्यामुळे या काळात सर्व देशांच्या क्रिकेट मंडळांकडून खेळाडूंना ही कृती न करण्याच्या सूचना देण्यात आल्या तर त्याचे नवलही कोणाला वाटणार नाही.
ग्लोव्हजचा वापर?
सामन्यादरम्यान फलंदाजांनी मारलेले फटके चौकार व षटकार ठरलेले चेंडू सीमारेषेवर असणारे बॉलबॉय तसेच स्टॅण्डमधील प्रेक्षक खेळाडूंकडे परत देतात. आता पुढील काळात मात्र, प्रेक्षकांना तसेच बॉलबॉय म्हणून कार्यरत असलेल्या मुलांना हातात ग्लोव्हज वापरण्याच्या सूचना करण्यात येणार असल्याचे संकेत नुकतेच (आंतरराष्ट्रीय क्रिकेट परिषदेने) आयसीसीने दिले आहेत. करोनाचा प्रभाव वाढत असताना डेव्हिस करंडक टेनिस व अमेरिकेतील काही टेनिस सामन्यांत लाइनमनला ग्लोव्हज वापरण्याची सक्ती करण्यात आली होती.