शहरात फक्त दोनच रस्त्यांवरुन प्रवेश; इतर सर्व रस्ते बंद
सातारा (प्रतिनिधी) – करोना विषाणूमुळे उद्भवणाऱ्या संसर्गजन्य आजारामुळे साताऱ्याचे प्रांताधिकारी तथा इन्सिडंट कमांडर यांनी सातारा शहरातील वाहतूक व्यवस्थेमध्ये बदल केले आहेत. त्यानुसार सातारा शहरामध्ये येणारे सर्व मुख्य व इतर रस्त्यांमध्ये बदल करण्यात येत असून, त्यामध्ये सातारा शहरामध्ये ‘कोरेगाव- सातारा’ या रोडवरील बॉम्बे रेस्टॉरंट चौक व मेढा रस्त्यावरील मोळाचा ओढा येथून फक्त वाहने शहरात येण्यास व बाहेर जाण्यास परवानगी देण्यात येणार आहे.
त्या व्यतिरिक्त सातारा शहरामध्ये येणारे इतर सर्व मुख्य रस्ते व इतर आत येणारे ‘छोटे-छोटे’ रस्ते पुढील आदेशापर्यंत सातारा शहरात प्रवेश करण्यास व शहरातून बाहेर पडण्यास बंद करण्यात येत आहे. तसेच लॉकडाऊनच्या कालावधीमध्ये अत्यावश्यक सेवा वगळून विनाकारण फिरत असलेल्या दुचाकी व चारचाकी वाहनांवर तसेच विनामास्क फिरणाऱ्या व्यक्तींवर नियमाप्रमाणे योग्य ती कडक कारवाई करण्याचेही प्रांताधिकारी तथा इन्सिडंट कमांडर यांनी सांगितले आहे.