शिरूर (प्रतिनिधी) – जगभरासह भारतामध्ये देखील कोरोना विषाणूने थैमान घातलं आहे. कोरोना विषाणूवर अद्याप प्रतिबंधात्मक लस अथवा ठोस उपचार पद्धती अवगत झाली नाही. यामुळं सध्याच्या घडीला कोरोनाचा प्रसार टाळायचा असल्यास सोशल डिस्टंसिंग हा एकमेव पर्याय उपलब्ध आहे. सोशल डिस्टंसिंगचे महत्व लक्षात घेता शिरूर येथील वळसंगे रुग्णालयातील डॉक्टर आशिष वळसंगे हे रुग्ण तपासणीसाठी व्हॉट्सऍपचा वापर करतायेत.
देशातील व राज्यातील कोरोना रुग्णांची संख्या वाढत असून रुग्ण तपासणीसाठी डॉक्टरांना आवश्यक असलेल्या पीपीई किट्स, एन- ९५ मास्कचा सर्वत्रच तुटवडा भासतोय. यामुळं कोरोनाग्रस्ताच्या संपर्कात आल्यास डॉक्टरांना कोरोनाचा धोका असून डॉक्टरांच्या संपर्कातील इतर रुग्णांनाही कोरोनाची लागण होऊ शकते. हाच संभाव्य धोका ओळखत डॉक्टर वळसंगे यांनी रुग्णांची ऑनलाईन तपासणी करण्याचा निर्णय घेतलाय.
रुग्णांनी तपासणीसाठी डॉ. वळसंगे यांच्या व्हॉट्सऍप क्रमांकावर संपर्क साधल्यानंतर त्यांना एक निश्चित वेळ देण्यात येत असून या वेळेत डॉक्टर या रुग्णांसोबत व्हिडीओ कॉलद्वारे संवाद साधून त्यांची ऑनलाईन तपासणी करतायेत. व्हिडीओ कॉलिंगद्वारे बोलल्याने रुग्णाच्या सर्व अडचणी डॉक्टरांना समजू शकतात अन त्यावर योग्य औषध उपचारही व्हॉट्सऍपव्दारे लिहून दिले जात आहे.याचा फायदा चांगल्या प्रकारे रुग्णांना होत असल्याचे डॉक्टर आशिष वळसंगे यांनी सांगितले आहे.
सध्याच्या कोरोना व्हायरस महामारीत डॉक्टरांमध्ये भीतीचे वातावरण आहे. अनेक डॉक्टरांना राज्यात करोना विषाणूची लागण झाली आहे. यामुळे अशाप्रकारच्या वैद्यकीय सेवेमुळे सोशल डीस्टनसिंग राखले जात असून कोरोनाचा धोका नाही त्यामुळे डाॅक्टर व रूग्ण (पेशंट) दोन्ही सुरक्षित राहू शकतात.