लॉकडाऊननंतर घरपोच मिळणार सोने
पुणे(प्रतिनिधी) – साडेतीन मुहूर्तांपैकी एक असलेल्या अक्षयतृतीयेला सोने खरेदी करण्याची परंपरा आहे. यावर्षी करोनाच्या पार्श्वभूमीवर निर्माण झालेल्या परिस्थितीत उद्याचा (रविवार, दि. 26) सोने खरेदीचा मुहूर्त चुकू नये, यासाठी सराफ व्यावसायिकांनी दागिन्यांची ऑनलाइन नोंदणी सुरू केली आहे. अक्षय तृतीयेच्या शुभमुहूर्तावर दागिन्यांची नोंदणी करून लॉकडाऊन संपल्यानंतर सोन्याचे दागिने घरपोच देण्यात येणार आहे.
लॉकडाऊनमुळे गुढी पाडव्यालाही नागरिकांना सोने खरेदी करता आले नाही. अक्षय तृतीयेला दरवर्षीप्रमाणे होणारी दागिन्यांची खरेदी यावर्षी कायम रहावी यासाठी सराफांनी ऑनलाइन दागिने खरेदीवर मोठ्या सवलती जाहीर केल्या आहेत. करोनाच्या प्रादुर्भावाला आळा घालण्यासाठी 24 मार्च रोजी पंतप्रधान नरेंद्र मोदी यांनी देशात लॉकडाउन पुकारला आहे. लॉकडाऊनच्या कालावधीत वाढ केल्याने अक्षय तृतीयेचा मूहूर्तही हातून जाणार अशी भिती व्यावसायिकांमध्ये होती.
अक्षय तृतीयेच्या दिवशी खरेदी केलेली गोष्ट अक्षय राहते, असे अनेक जण मानतात. त्यामुळे किमान वेढणीची खरेदी करावी असा ग्राहकांचा कल असतो. गुढीपाडव्यानंतर अक्षय तृतीयेचा मुहूर्त हातचा जाऊ नये, यासाठी शहरातील सराफा व्यावसायिकांनी ऑनलाईनचा मार्ग अवलंबला आहे. ज्यांना ऑनलाईन नोंदणी करता येणे शक्य नाही. त्यांची नोंदणी फोनवर घेतली जाणार आहे. फोनवर बँक खात्याच्या तपशिलाची देवाण-घेवाण करून पैसे भरण्याची सोय काही सराफा व्यावसायिकांनी उपलब्ध करून दिली आहे.
याविषयी, पुणे सराफ असोसिएशनचे अध्यक्ष फत्तेचंद रांका म्हणाले, लॉकडाऊनमुळे जीवनावश्यक सेवा वगळता सर्व दुकाने बंद आहेत. अक्षय तृतीयेचा मुहूर्त साधता यावा, यासाठी शहरातील सराफा व्यावसायिकांनी ऑनलाईन बुकिंग पर्याय सुरू केला आहे. लॉकडाऊन संपल्यानंतर ग्राहकांना त्यांची ऑर्डर देण्यात येईल.