माद्रिद – नाओमी ओसाकाने प्रतिस्पर्धी डॉमिनिका चिबुल्कोव्हावर मात करीत येथे होत असलेल्या माद्रिद खुल्या टेनिस स्पर्धेत लाल मातीच्या कोर्टवर विजयी सुरूवात नोंदवली. पोटाच्या दुखापतीमुळे स्टुटगार्ट खुल्या स्पर्धेतून माघार घ्यावी लागलेल्या ओसाकाला महिनाअखेरीस होणाऱ्या फ्रेंच खुल्या टेनिस स्पर्धेत खेळता येणार का? याबाबत प्रश्नचिन्ह निर्माण झाले होते.
दुखापतीनंतर पुनरागमन करणाऱ्या ओसाकाने सामन्याच्या सुरूवातीपासूनच दमदार खेळ करत ओसाकाने आपण पुन्हा लयीत परतत असल्याचा प्रत्यय दिला. ओसाकाने चिबुल्कोव्हावर संघर्षपूर्ण लढतीत 6-2, 7-6 असा विजय मिळवला. आता ओसाकाला पुढील फेरीत स्पेनच्या सारा सॉरीबेस टोरमोशी झुंजावे लागणार आहे. यावेळी पहिला सेट सहज जिंकनाऱ्या ओसाकाला दुसऱ्या सेट मध्ये चांगलीच झुंज द्यावी लागली.
फ्रेंच ग्रॅंडस्लॅम स्पर्धेची विजेती सिमोना हलेप हिने रशियाच्या मार्गारिटा गास्पारयान हिचा अडसर 6-0, 6-4 असा सहज दूर केला. कॅरोलिन वॉझ्नियाकीला फ्रान्सच्या अलिझ कॉर्नेटविरुद्धच्या दुखापतीमुळे 0-3 अशा स्थितीतून माघार घ्यावी लागली. कॅरोलिना प्लिस्कोव्हाने युक्रेनच्या डायना यास्तरेमस्का हिचे आव्हान 5-7, 7-6 (7/5), 6-3 असे परतवून लावले.