नगर – नगर अर्बन बँकेतील तीन कोटींच्या अपहार (चिल्लर घोटाळा) प्रकरणी अर्थिक गुन्हे शाखेने नगरमधील उद्योजक आशुतोष सतीष लांडगे याला अटक केली आहे. त्याला बुधवारी न्यायालयात हजर केले असता 30 मार्चपर्यंत पोलीस कोठडी देण्यात आली आहे.
पिंपरी चिंचवड शाखेतील 22 कोटी रुपयांच्या अपहार प्रकरणी लांडगे याला काही दिवसांपूर्वी पिंपरी पोलिसांनी अटक केली होती. तर कोतवाली पोलिस स्टेशनला दाखल असलेल्या अर्बन बँकेतील तीन कोटी रुपयांच्या अपहाराच्या गुन्ह्यात त्याचे नाव आहे. त्यामुळे नगरच्या आर्थिक गुन्हे शाखेने पिंपरी-चिंचवड पोलिसांनी कायदेशीर प्रक्रिया पूर्ण करून लांडगे याला या गुन्ह्यात मंगळवारी वर्ग करून अटक केली.
बुधवारी न्यायाधीश एस. एस. पाटील यांच्या न्यायालयात त्याला हजर करण्यात आले. आरोपी याने अर्बन बँकेचे 1 कोटी 35 लाख रुपये 34 दिवस वापरले आहेत. त्या बाबत तपास करायचा आहे. वँकेतील अधिकारी, बँकेचे संचालक यांनी मदत केली का याचा तपास करायचा असल्याचा युक्तिवाद आर्थिक गुन्हे शाखेचे पोलिस निरीक्षक ज्योती गडकरी यांनी केला.
तपासासाठी पोलिस कोठडी देण्याची विनंती त्यांनी न्यायालयाकडे केली. आरोपी लांडगे यांच्याकडून अॅड. विक्रम वाडेकर यांनी बाजू मांडली. एका गुन्ह्यात पंधरा दिवसांपासून लांडगे हे अटक आहेत. बँकेकडील सर्व कागदपत्रे पोलिसांकडे आहेत. केवळ बँकेचे संचालक, शाखाधिकायांच्या अंतर्गत वादातून त्यांना अटक झाली आहे.
केवळ बँकेच्या जुन्या पदाधिकार्यांच्या उपोषणामुळे त्यांच्याविरुध्द गुन्हा नोंदविण्यात आला आहे. त्यांनी 1 कोटी 3 लाख व 1 कोटी 37 लाख रुपयांचे कर्ज ही आरटीजीएसने बँकेकडे भरलेले आहेत. त्यांच्याकडून पोलिसांकडून काहीही हस्तगत करायचे नाही. त्यामुळे आरोपीला न्यायालयीन कोठडी द्यावी, असा युक्तिवाद वाडेकर यांनी केला. त्यानंतर न्यायालयाने लांडगे याला 30 मार्चपर्यंत पोलिस कोठडी सुनावली आहे. या गुन्ह्यात यापूर्वी बँकेच्या चार अधिकार्यांना आर्थिक गुन्हे शाखेने अटक केले आहे.