जगातील तिसऱ्या उंच शिखरावर फडकाविला तिरंगा
अशा प्रकारची मोहीम फत्ते करणारी जगातील पहिली नागरी मोहीम
पुणे – “खराब हवामान, खडतर प्रवास, शारिरीक आणि मानसिक क्षमतांची कसोटी पाहणारा प्रत्येक क्षण अशा बिकट परिस्थितीचा सामना करत पुण्यातील गिरीप्रेमी संस्थेच्या गिर्यारोहकांनी माऊंट कांचनजुंगा या जगातील तिसऱ्या उंच शिखरावर चढाईची मोहीम यशस्वी केली. महत्त्वाचे म्हणजे अशा प्रकारची मोहीम फत्ते करणारी ही केवळ भारतातील नव्हे तर जगातील पहिली नागरी मोहीम आहे,’ अशी माहिती गिरीप्रेमी संस्थेतर्फे उमेश झिरपे यांनी दिली.
या मोहिमेबाबत झिरपे म्हणाले, “कांचनजुंगा शिखर हे चढाईसाठी तांत्रिकदृष्ट्या कठीण आहे. शिखरावर चढाई करणे हे माउंट एव्हरेस्टवर चढाई करण्यापेक्षाही कठीण मानले जाते. आजपर्यंत एव्हरेस्टवर सहा हजारच्या आसपास गिर्यारोहकांनी पाऊल ठेवले आहे, तर कांचनजुंगावर फक्त 300 च्या घरात गिर्यारोहक यशस्वी चढाई करू शकले आहेत. यावरून कांचनजुंगा शिखराची काठीण्य पातळी अधोरेखित होते.’
या मोहिमेत गिरीप्रेमीतर्फे आशिष माने, रुपेश खोपडे, भूषण हर्षे, आनंद माळी, प्रसाद जोशी, कृष्णा ढोकले, डॉ. सुमित मांदळे, विवेक शिवदे, किरण साळस्तेकर आणि जितेंद्र गवारे या 10 गिर्यारोहकांनी शिखरावर चढाई केली. या व्यतिरिक्त जगभरातील 20 गिर्यारोहकही या मोहिमेत सहभागी झाले होते. मोहिमेत सहभागी एकूण 30 पैकी 21 गिर्यारोहकांनी आतापर्यंत यशस्वी चढाई केली आहे. मंगळवारी संध्याकाळी पाच वाजता सर्व गिर्यारोहकांनी कॅम्प 4 हून शिखर चढाई करण्यास सुरवात केली व 12 तासांच्या अथक आणि अत्यंत अवघड चढाईनंतर शिखरमाथा गाठला, असेही त्यांनी सांगितले.
माउंट कांचनजुंगाविषयी
भारत आणि नेपाळ या देशांच्या सीमेवर हे शिखर वसलेले आहे. माउंट एव्हरेस्ट व माउंट के 2 नंतर उंचीनुसार जगातील तिसऱ्या क्रमांकाचे शिखर असून याची उंची सुमारे 8586 मीटर आहे. या शिखरावर चढाईसाठी दोन मार्ग आहेत. एक मार्ग कांचनजुंगा व झेमू ग्लेशियरच्या बाजूने भारतीय बाजूचा मार्ग आहे. मात्र, हा मार्ग सध्या बंद आहे. तर दुसरा मार्ग नेपाळच्या बाजूने यालुंग ग्लेशियरमार्गे आहे. गिरीप्रेमीच्या गिर्यारोहकांनी याच मार्गाने चढाई केली आहे.
चढाईतील आव्हान
– बेसकॅम्प ते कॅम्प 1 मार्ग : (5457 मीटर ते 6000 मीटर)- तीव्र बर्फाळ पर्वतरांग
– कॅम्प 1 ते कॅम्प 2 मार्ग : (अंदाजे 6300 मीटर) ब्लू आईस (टणक बर्फ ज्यावरून चालणे व चढाई करणे अत्यंत अवघड) तसेच 100 मीटर्सची बर्फाची 70 ते 80 अंश कोनातील उभी भिंत.
– कॅम्प 2 ते कॅम्प 3 : (अंदाजे 6900 मीटर) दगडी भिंती, चढाई मोहिमेतील सर्वाधिक मृत्यू याच टप्प्यात.
– कॅम्प 3 ते कॅम्प 4 : (अंदाजे 7500 ते 7700 मीटर) प्रचंड हिमभेगा, सतत हालचाल होणारा भाग
– कॅम्प 4 ते शिखरमाथा : (8586 मीटर) कॅम्प ते शिखरमाथाते पुन्हा कॅम्प हा प्रवास तब्बल 24 ते 27 तासांचा, अत्यंत थकवणारा, माउंट एव्हरेस्टवर याच टप्प्यांमध्ये चढाई- उतराईसाठी तुलनेने कमी म्हणजे 14 ते 17 तास लागतात.