नगर – गुजरातमधील सुरत येथील खासगी शिकवणी वर्ग सुरू असलेल्या मजल्यावर आग लागून विद्यार्थ्यांच्या झालेल्या मृत्युच्या पार्श्वभूमीवर अशी दुर्घटना नगरमध्ये घडू नये, यासाठी खबरदारीचा उपाय म्हणून नगर शहरातील सर्व शासकीय कार्यालये, सार्वजनिक, खाजगी इमारतींचे येत्या 3 महिन्याच्या आत फायर ऑडिट करावे, अशा सूचना महापालिकेने दिल्या आहेत.
यात टाळाटाळ करणाऱ्यांवर कायदेशीर कारवाई करण्याचा इशाराही देण्यात आला आहे. शासकीय कार्यालये तसेच महापालिकेची स्वतःची कार्यालये यासह सार्वजनिक वापराच्या व लोकांची वर्दळ असणाऱ्या खासगी इमारती (सिनेमा हॉल्स, नाट्यगृहे, रुग्णालये, वाणिज्य/व्यापारी संकुल, मॉल्स, तारांकित हॉटेल्स, मोठी व्यावसायिक कार्यालये, शिकवणी वर्ग इ.)
या इमारतीमधील अग्निसुरक्षा व्यवस्थेचे परीक्षण (फायर सेफ्टी ऑडिट) करून घेणे महाराष्ट्र आग प्रतिबंधक जीवनसुरक्षा उपाययोजना अधिनियम 2006 चे कलम 3 (1) नुसार बंधनकारक असून असे परिक्षण अधिनियमातील कलम 3 (3) नुसार अनुज्ञाप्तीधारक अभिकरणाकडून करून घेऊन सदर अहवाल वर्षातून दोन वेळा जानेवारी व जुलैमध्ये मुख्य अग्निशमन अधिकारी यांना सादर करावयाचा असून, खासगी इमारतींबाबत ही जबाबदारी इमारतीचे मालक अथवा भोगवटादार यांची आहे. कलम 9 नुसार शासनाने नियुक्त केलेल्या अनुज्ञप्तीधारक अभिकरण कडून इमारतीचे परिक्षण करून अहवाल महापालिकेचे अग्निशमन अधिकारी, मध्यवर्ती अग्निशमन केंद्र यांच्याकडे सादर करावा.