तेलाच्या संशोधनाचे उज्ज्वल भवितव्य
नवी दिल्ली, ता. 16 – खंबायत विभागात तेलाच्या शोधात अनुकूल फल पदरात पडेल अशी आशा भारतीय भूस्तरवैज्ञानिकांना वाटते आहे असे के. डी. मालवीय यांनी तेल संशोधनाविषयी सादर केलेल्या निवेदनांत म्हटले आहे.
या बाबतची ताजी बातमी अशी आहे ः बडोद्यामध्ये सुरू झालेल्या 12व्या विहिरीत गॅस व थोडेसे तेल दिसून आले आहे. या माहितीमुळे तेलाचा साठा मोठ्या विहिरीत साठवून ते व्यापारी पद्धतीने वापरण्याचा प्रश्नच सोडवावयाचा उरले आहे. खंबायत भाग असा आहे की, समुद्र किनारी भागांत तेल उपलब्ध होईल.
खेडुताच्या शौर्याबद्दल पारितोषिक
ग्वाल्हेर – मोरेना जिल्ह्यातील जागरबाद खेड्यातील दोन रहिवाशी दरोडेखोरांबरोबर लाठ्यानिशी झगडले. दरोडेखोर बंदुकानिशी आले होते. खेडुतांना डाकूंच्या जवळचे 12 बोअरची बंदुक सापडली. त्यांनी दोघा दरोडेखोरांना जखमी केले पण ते निसटून गेले. खेडुतांनी दाखविलेल्या शौर्याच्या कौतुकार्थ जिल्हाधिकाऱ्यांनी 12 बोअरची बंदुक व 100 रुपये खेडुतांना बक्षिस दिले.
माओ त्से तुंग अध्यक्षपदासाठी उभे राहत नाही
पेकिंग – चालू मुदत संपल्यावर चिनी गणराज्याच्या अध्यक्षपदाच्या निवडणुकीसाठी पुन्हा उभे राहावयाचे नाही असे माओ त्से तुंग यांनी ठरविले असल्याचे नेहमीच्या विश्वसनीय गोटातील वृत्त आहे. माओ यांच्या या निर्णयास पक्षाने संमती दिली असल्याचे उपपंतप्रधान आणि परराष्ट्रमंत्री चेन यी यांनी राजदूतांच्या बैठकीत सांगितल्याचे कळते.
ते पुढे म्हणतात, की माओ हे साम्यवादी पक्षाचे अध्यक्ष राहून धोरणाबाबत मार्गदर्शन करीत राहतील. ते अध्यक्षपदाला उभे राहत नाहीत याचा अर्थ त्यांना पदभ्रष्ट केले जात आहे असा होत नाही. पक्षाचे अध्यक्ष या नात्याने त्यांचे महत्त्व व प्रभाव कायमच राहील.
समाजवादी-प्र. स. पक्ष विलिनीकरण-वाटाघाटी चालू नाहीत – मधु लिमये
हैदराबाद – प्र. स. पक्षात समाजवादी पक्षाचे विलीनीकरण करण्याच्या तथाकथित हालचाली विषयी आम्हास काही कर्तव्य नाही, असे समाजवादी पक्षाचे अध्यक्ष मधु लिमये यांनी स्पष्ट केले. फुटीरांनी काही बनाव केला असल्यास शिस्तभंगाची कारवाई केली जाईल, असे ते म्हणाले.