प्रेमप्रकरणातून अल्पवयीन मुलाने केला मित्राचा खून

संगमनेर – येथील एका कनिष्ठ महाविद्यालयात शिक्षण घेत असलेल्या दोन मित्रांमध्ये मुलीच्या प्रेम प्रकरणावरून वाद झाला. त्याचे रूपांतर हाणामारीत होऊन अल्पवयीन मुलाने आपल्या मित्राचा चाकू भोसकून खून केल्याची घटना समोर आली आहे. याप्रकरणी पोलिसांनी एका अल्पवयीन आरोपी मुलाला (मयताचा मित्र) ताब्यात घेतले असून, त्याने गुन्ह्याची कबूली दिली आहे.

याबाबत संगमनेर तालुका पोलिसांकडून मिळालेली अधिक माहिती की, तालुक्‍यातील तिगाव, येथील मयत तरुण शनिवारी (दि.6) येथील कनिष्ठ महाविद्यालयात शिक्षणाच्या उद्देशाने घरातून निघाला असता तो घरी परतला नाही. याबाबत प्रमोदच्या कुटुंबीयांनी तालुका पोलिसात (दि.9) मिसिंगची तक्रार दाखल केली. पोलिसांनी चौकशी सुरु करून, एका अल्पवयीन मित्रावर संशय आला. पोलिसांनी खाक्‍या दाखवताच आरोपी मुलाने सर्व प्रकार सांगितला.

शनिवारी (दि.6) तालुक्‍यातील खांडगाव शिवारातील कपालेश्वर मंदिराजवळ मयत तरूण व आरोपी मित्र फिरायला गेले असता, मुलीच्या प्रेमप्रकरणावरून त्यांच्यात वाद सुरु झाला, त्याचे रूपांतर हाणामारीत होऊन, रागाच्या भरात आरोपीने प्रमोदवर चाकूने वार केले. यात त्याचा मृत्यू झाल्याची कबूली आरोपीने दिली. त्यानुसार आज सकाळी पोलिसांनी घटनास्थळी जाऊन मृतदेह ताब्यात घेतला.

अल्पवयीन आरोपी मुलाला बालसुधारगृहात पाठविण्यात येणार आहे. प्रकरणाचा पुढील तपास पोलीस निरीक्षक सुनील पाटील यांच्या मार्गदर्शनाखाली सहा. पोलीस निरीक्षक खिळे करीत आहेत.

LEAVE A REPLY

Please enter your comment!
Please enter your name here

Enable Google Transliteration.(To type in English, press Ctrl+g)