– अरुणकुमार मोटे
सविंदणे – शिरूर, रांजणगाव, शिक्रापूर पोलीस हद्दीतील अनेक गावांमध्ये मोठ्या प्रमाणात गांजाची विक्री होत आहे. ओडिशावरून शिरूर तालुक्यात येणारे वाहन सोलापूर येथे ताब्यात घेतल्यानंतर परराज्यातील गांजा विक्रीचे रॅकेट सक्रिय असल्याची माहिती उघड झाली आहे. यातून कोट्यवधी रुपयांची उलाढाल होत आहे. दम मारो दमच्या नशेत तरुणाई भरकटली आहे. सोलापूर येथील कारवाईतून पोलिसांनी झारीतील शुक्राचार्य शोधले आहेत. मात्र, तस्करीच्या रॅकेटच्या मुसक्या आवळण्याचे काम पोलिसांसमोर उभे ठाकले आहे.
शिरूर, रांजणगाव, शिक्रापूर पोलीस याकडे लक्ष देणार का, असा सवाल सर्वसामान्य नागरिकांमधून उपस्थित होत आहे.
नुकतेच शिरूर तालुक्यातील एका महिलेसह दोघांना सीमा शुल्क विभागाने सोलापूर येथे ओडिशावरून शिरूरला गांजा आणताना पकडले आहे. त्यांच्याकडून 54 किलो वजनाचा 12 लाख रुपयांचा गांजा जप्त केला होता. हा गांजा शिरूर तालुक्यात कोणकोणत्या गावांमध्ये वितरित होणार होता. याची कसून चौकशी सुरू आहे. या चौकशीतून गांजा तस्करीचे मोठे रॅकेट उघडकीस येण्याची शक्यता आहे.
मागील वर्षी रामलिंग येथे राहणाऱ्या एका गांजा विक्रेत्यावर पुणे शहर गुन्हे शाखा विभागाने धाड टाकली होती. त्यावेळी शिरर पोलिसांच्या कर्तव्यनिष्ठेवर प्रश्नचिन्ह उपस्थित झाले होते, रांजणगाव हद्दीत ढोकसांगवी येथे गांजा विक्री होत असल्याची नागरिक चर्चा करीत आहे. काही महिन्यांपूर्वी रांजणगाव पोलिसांना एका बसमध्ये गांजा आढळला होता. ती कारवाई गुलदस्त्यात आहे. शिक्रापूर परिसरात छोट्या टपरी, दुकानात गांजाची किरकोळ विक्री सुरू आहे. तालुक्यात गांजाची जोरात विक्री सुरू आहे. त्यांच्यावर कधी कारवाई होणार, याकडे तालुक्याचे लक्ष लागले आहे.
शिरूर पोलीस स्टेशनकडून शिरूर तालुक्यातील काठापूर येथे 2021 मध्ये 40 किलो, शिरूर शहरात दोनवेळा 20 किलो गांजा जप्त करून गांजा विक्रेत्यांवर कारवाई करण्यात आली होती. शाळा, कॉलेज तसेच आसपासच्या टपऱ्या, दुकानात अशा प्रकारे अमली पदार्थ आढळून आल्यास कठोर कारवाई करण्यात येईल. अंमली पदार्थ विक्रीबाबतीत नागरिकांना काही माहिती मिळाल्यास शिरूर पोलिसांशी संपर्क साधावा. माहिती सांगणाऱ्यांची नावे गुपित ठेवली जाईल.
– सुरेशकुमार राऊत, पोलीस निरीक्षक, शिरूर.
परराज्यातील रॅकेट रडारवर
नगर जिल्ह्यातून तसेच ओडिशा, मध्य प्रदेश राज्यातून मोठ्या प्रमाणात आवक होत आहे. पुणे जिल्ह्यातील शिरूर तालुका हा खरेदीदारांमध्ये हिटलिस्टवर असल्याचे उघड झाले आहे. होलसेल विक्रेते हे परराज्यात आहेत. त्यांच्यामार्फत साखळी पद्धतीने छोट्या वितरकांपर्यंत माल पोहोच केला जातो. त्यानंतर हे छोटे विक्रेते गावांपर्यंत पोहोचत असल्याने विनासायास माल मिळत आहे. शिरूर तालुक्यातील प्रत्येक गावांत दररोज गांजा ओढणाऱ्यांची संख्या ही 15 ते 20 इतकी आहे. त्यामुळे प्रत्येक गावातील 80 कुटुंबे ही व्यसनाच्या खाईत होरपळत आहेत.
सात हजार रुपये किलो भाव
गांजाची विक्री ही सात हजार रुपयांच्या घरात आहे. दोन किलोप्रमाणे बंद पाकीट असते. विक्री करताना सोन्याच्या भावात दहा ग्रॅमपासून ते अडीचशे ग्रॅमपर्यंत विक्री केली जात आहे. त्यामुळे सोन्याचा ग्रॅमप्रमाणे भाव बाजारपेठेत सुरू आहे. गांजा ओढणारे दिवसभर नशेत भरकटलेली असतात. त्यामुळे आज प्रत्येक गावात 20 लोक व्यसनाच्या आहारी गेले आहेत. भविष्यात ही संख्या वाढण्याची शक्यता नाकारता येत नाही.