मेलबर्न – भारतीय पुरुष हॉकी संघाला जागतिक क्रमवारीत दुसऱ्या स्थानावर असणाऱ्या ऑस्ट्रेलिया संघाकडून 4-0 असा पराभव पत्करावा लागला. सध्या भारतीय संघ ऑस्ट्रेलिया दौऱ्यावर असून, या दौऱ्यातील भारतीय संघाची ही चौथी लढत होती. पहिल्या तीन लढतीत जागतिक क्रमवारीत पाचव्या स्थानावर असणारा भारतीय संघ अपराजित राहिला. मात्र, चौथ्या लढतीत ऑस्ट्रेलियाने भारताचा एकतर्फी पराभव केला. या लढतीत ऑस्ट्रेलियाकडून गोव्हर्स (15 आणि 60 मि.) आणि हायवर्ड (20 आणि 59 मि.) यांनी प्रत्येकी दोन गोल करत भारताच्या बचाव फळीला नमोहराम केले होते.
भारतीय संघाला पाचव्याच मिनिटाला पेनल्टी कॉर्नर मिळाला होता. मात्र, हरमनप्रीतसिंगने ही संधा वाया घालवली. यानंतर बाराव्या मिनिटालाही भारताला गोल करण्याची संधी साधता आली नाही. यानंतर पहिल्या सत्रातील अखेरच्या क्षणी मिळालेल्या पेनल्टी स्ट्रोकवर गोव्हर्सने कुठलीही चूक न करता ऑस्ट्रेलियाला आघाडी मिळवून दिली. यानंतर 20व्या मिनिटाला हायवर्डने गोल करून मध्यंतराला ऑस्ट्रेलियाला 2-0 अशी आघाडी मिळवून दिली होती.
अखेरच्या दोन मिनिटांत भारताच्या बचाव फळीने कच खाल्ला आणि त्याचा फटका बसला. सलग दोन मिनिटांत गोव्हर्स आणि हायवर्ड यांनी गोल करून ऑस्ट्रेलियाला 4-0 असा विजय मिळवून दिला. भारतीय संघ शुक्रवारी या दौऱ्यातील पाचवा आणि अखेरचा सामना खेळणार आहे.