पिंपरी – रस्ता ओलांडत असताना अज्ञात वाहनाने धडक दिल्यामुळे झालेल्या मृत्यूप्रकरणी पोलिसांनी फिर्याद दाखल केली आहे. हा अपघात मुंबई बेंगलुरु हायवेवरील सेन्टोसा रिसॉर्टसमोर, रावेत येथे 2 सप्टेंबर 2018 रोजी सकाळी 11 वाजता झाला होता. सरदार विलास पोवार (वय 47, रा. पुनाळ ता. पन्हाळा, जि. कोल्हापुर) असे मयत पादचाऱ्याचे नाव आहे. याप्रकरणी पोलीस नाईक वसीम महंमद शेख यांनी सोमवार (दि.10) देहुरोड पोलीस ठाण्यात फिर्याद दिली आहे. त्यानुसार, अज्ञात वाहनचालकाविरोधात गुन्हा दाखल करण्यात आला आहे.
पोलिसांनी दिलेल्या माहितीनुसार, 2 सप्टेंबर 2018 रोजी सकाळी 11 वाजताच्या सुमारास सरदार पोवार हे रावेत येथील सेन्टोसा रिसॉर्टसमोरील रस्ता ओलांडत होते. यावेळी भरधाव अज्ञात वाहन चालकाने त्यांना जोरदार धडक दिली. या घटनेत गंभीर जखमी झालेल्या सरदार यांचा मृत्यू झाला. देहुरोड पोलीस आरोपी वाहनचालकाचा शोध घेत आहेत.