वेगाच्या बादशहाच्या कारकीर्दीचा वेदनादायी शेवट

लंडन : वेगाचा बादशहा अशी ओळख असलेल्या युसेन बोल्टच्या कारकीर्दीचा आज वेदनादायी शेवट झाला.  कारण लंडनच्या जागतिक अॅथलेटिक्स स्पर्धेत बोल्ट फोर बाय हंड्रेड मीटर्स रिले या शर्यतीची फायनल पूर्णही करू शकला नाही. बोल्टच्या डाव्या मांडीचा स्नायू अचानक दुखावल्याने, तो रिले शर्यतीच्या अखेरच्या लॅपमध्ये कळवळून खाली कोसळला. त्यामुळे जमैकाच्या चौकडीला या शर्यतीतून पदकाविनाच माघारी परतावे लागले.
बोल्टने योहान ब्लेककडून बॅटन स्वीकारून अखेरच्या लॅपमध्ये मुसुंडी मारली होती. पण डाव्या मांडीतल्या असह्य वेदनांमुळे तो काही क्षणातच कळवळून ट्रॅकवर कोसळला. लंडनच्या ऑलिम्पिक स्टेडियममधले ते दृश्य जगभरच्या अॅथलेटिक्स चाहत्यांसाठी धक्कादायक ठरले. वेदनांनी कळवळणारा बोल्ट काही क्षण ट्रॅकवरच पडून होता. मग योहान ब्लेक, ज्युलियन फोर्टे आणि ओमार मॅकलोड या सहकाऱ्यांनी जाऊन त्याला सावरले. त्यामुळे बोल्टला 100 मीटर्स शर्यतीतल्या ब्राँझपदकानेच जागतिक अॅथलेटिक्सचा निरोप घ्यावा लागला.

LEAVE A REPLY

Please enter your comment!
Please enter your name here

Enable Google Transliteration.(To type in English, press Ctrl+g)