विद्यापीठाचा दर्पेश डिंगर राजपथावरील “एनएसएस’ पथकाचे नेतृत्व करणार

 

प्रभात वृत्तसेवा
पुणे – नवी दिल्ली येथे प्रजासत्ताक दिनी राजपथावरील पथसंचलनात राष्ट्रीय सेवा योजनेच्या (एनएसएस) पथकाचे नेतृत्व करण्याचा मान महाराष्ट्र अर्थात सावित्रीबाई फुले पुणे विद्यापीठाच्या विद्यार्थ्याकडे आला आहे. विद्यापीठाशी संलग्नित असलेल्या पुण्यातील सिंहगड इन्स्टिटयूट ऑफ इंजिनियरिंग महाविद्यालयाचा विद्यार्थी दर्पेश डिंगर “एनएसएस’ पथकाचे नेतृत्व करणार आहे.

-Ads-
दैनिक प्रभातचे फेसबुक पेज लाईक करा

महाराष्ट्रातील सर्वच 14 आणि गोव्यातील 2 अशा एकूण 16 विद्यार्थी- विद्यार्थींनीची या पथसंचलनासाठी निवड झाली आहे. देशभरातील 15 विभागांमधून एकूण 200 एनएसएस स्वयंसेवक या शिबिरात सहभागी झाले असून यापैकी 160 विद्यार्थ्यांची पथसंचलनासाठी निवड झाली आहे. यापूर्वी प्रजासत्ताक दिनी राजपथावरील पथ संचलनात राष्ट्रीय सेवा योजना पथकाचे नेतृत्व करण्याचा बहुमान महाराष्ट्राच्या सोपान मुंडे, खूशबु जोशी आणि आसीफ शेख यांनी मिळविला आहे. यावर्षी प्रजासत्ताक दिनी राजपथावर होणा-या पथसंचलनासाठी केंद्रीय क्रीडा व युवक कल्याण मंत्रालयांतर्गत येथील चाणक्‍यपुरी भागातील इंटरनॅशनल यूथ होस्टेल येथे एनएसएस सराव शिबिराला 1 जानेवारी पासून सुरुवात झाली आहे. एनएसएसच्या देशभरातील 15 विभागांमधून एकूण 200 एनएसएस विद्यार्थी यात सहभागी झाले आहेत.

दर्पेशच्या मेहनतीला यश
मुळचा नाशिक जिल्ह्यातील मालेगांव तालुक्‍यातील तोकडे गावचा दर्पेश डिंगर याने आवाज, शिस्त, नियमितता व मेहनतीच्या जोरावर राजपथावरील पथसंचलनात एनएसएस पथकाच्या नेतृत्वाचा मान पटकविला आहे. प्रजासत्ताक दिनी राजपथावर पथसंचलनात सहभागी होण्यासाठी एन एस एस च्या विद्यार्थ्यांमध्ये देशपातळीवर मोठी स्पर्धा असते. पथसंचलनातून संपूर्ण देशातील सामर्थ्य व संस्कृतीचे दर्शन घडते या सोहळ्यात सहभागी 160 विद्यार्थ्यांच्या एनएसएस पथकाचे नेतृत्व करायला मिळणे ही अभिमानाची बाब असल्याची भावना दर्पेशने व्यक्त केली.

नवी दिल्लीच्या पथ संचलनात राष्ट्रीय सेवा योजनेच्या पथकाचे नेतृत्व करण्याचा मान महाराष्ट्राला मिळाला आहे. पुणे विद्यापीठाचा प्रतिनिधी म्हणून दर्पेश डिंगर हा पथकाच्या अग्रभागी राहणार आहे. सावित्रीबाई फुले पुणे विद्यापीठाला हा मोठा बहुमान मिळाला असून, त्याचा निश्‍चितच आनंद आहे.
डॉ. प्रभाकर देसाई, संचालक : विद्यार्थी कल्याण मंडळ

LEAVE A REPLY

Please enter your comment!
Please enter your name here

Enable Google Transliteration.(To type in English, press Ctrl+g)