राष्ट्रीय कॉंग्रेसचा 20-0 ने विजय निश्‍चित : मनोहर शिंदे

अल्पावधीतच सातारा जिल्ह्याच्याच नव्हे तर देशाच्या राजकीय पटलावर एक आदर्श नगरपंचायत म्हणून ओळखली जाणारी एकमेव नगरपंचायत म्हणजेच मलकापूर नगरपंचायत व सध्याची नगरपरिषद…! माजी आमदार स्व. भास्करराव शिंदे (दादा) यांच्या स्वप्नातील मलकापूर सर्वांगसुंदर करण्याचा प्रयत्न माजी मुख्यमंत्री आ. पृथ्वीराज चव्हाण (बाबा) यांच्या मार्गदर्शनाखाली सुरु आहे. मलकापूर नगरपरिषद निवडणुकीत 19 उमेदवार व 1 नगराध्यक्ष उमेदवार निवडणूक रिंगणात उतरले असून मलकापूरचे सूज्ञ मतदार राष्ट्रीय कॉंग्रेसच्या सर्वच उमेदवारांना निवडून देत 20-0 असाच निकाल देतील, असा ठाम विश्‍वास मलकापूरचे नेते, माजी उपनगराध्यक्ष मनोहर शिंदे यांनी दैनिक प्रभातशी बोलताना व्यक्त केला.

सर्वसामान्य नागरिक, प्रशासन आणि लोकप्रतिनिधी यांच्या लोकसहभागाची उत्तम सांगड घालून वाटचाल करणाऱ्या मलकापूर नगरपंचायतीने आपली प्रगती खूप वेगाने करीत देशातच नव्हे तर जगभरात आपली स्वतंत्र ओळख निर्माण केली आहे. 24 बाय 7 पाणी पुरवठा योजनेमुळे नागरिकांचे राहणीमान उंचावले असून पंतप्रधान पुरस्कार, नॅशनल अर्बन वॉटर ऍवार्ड आणि वीज बचतीसाठीचा महाराष्ट्र शासनाचा ऍवार्ड पटकावणाऱ्या मलकापूर शहर परिसराचा चेहरामोहरा बदलत चालला आहे. घराघरात 24 तास मुबलक पाणी देणारे मलकापूर हे देशातील पहिले शहर ठरल्याने अतिविकसीत शहरातील नागरीकांच्या भुवया उंचावल्या आहेत.

-Ads-
दैनिक प्रभातचे फेसबुक पेज लाईक करा

मलकापूर नगरपंचायतीचा कारभार सध्या तीन वेगवेगळ्या ठिकाणी सुरु आहे. ही कार्यालये वेगवेगळ्या ठिकाणी असल्याने कामकाजात विस्कळीतपणा येत आहे. तसेच नागरिकांनाही गैरसोयीचे होत असल्याने मलकापूर नगरपंचायतीची एकाच ठिकाणी भव्य कार्यालय उभारण्याचा जिव्हाळ्याचा प्रश्‍न मार्गी लावला आहे. मलकापूर शहराच्या सौंदर्यात भर टाकणारी संसद भवनाच्या धरतीवर 50 हजार चौरस फुटाचे मलकापूर नगरपरिषदेची दुमजली भव्य दिव्य प्रशासकिय इमारतीचे बांधकाम महामार्गालगत सुरु केले आहे. या इमारतीशेजारी अग्नीशामक बंब मलकापूरच्या सेवेत लवकरच दाखल होणार आहे. दूरदृष्टी असलेल्या आ. पृथ्वीराज चव्हाण यांच्या कुशल मार्गदर्शनाखाली

मनोहर शिंदे यांची सहकाऱ्यांना बरोबर घेवून वाटचाल सुरु आहे.
आगाशिवनगर मलकापूर शहराचा चौफेर विकास साधताना विविध योजनांची प्रभावीपणे अंमलबजावणी करुन नाविण्यपूर्ण योजनांची एक प्रयोगशाळा निर्माण करुन एक आदर्श सर्वांसमोर ठेवला. स्त्रीभ्रूण हत्त्या रोखणारी व स्त्री शक्तीला बळ देणारी एक महत्वकांक्षी योजना म्हणजे प्रियदर्शनी कन्यारत्न योजनेचा लाभ आजअखेर 175 मुलींना व कुटुंबांना होत आहे. मुलींसाठी देशात प्रथमच राबवलेली 2013 पासून राबविण्यात येत असलेली महत्त्वकांक्षी योजना म्हणजे प्रेमिलाताई चव्हाण कन्या सुरक्षा अभियान.

या योजनेतून 2 लाख 179 विद्यार्थीनीसाठी मोफत एस. टी. बस पासचा लाभ घेतला आहे. ऊर्जेचा तुटवडा, गॅस, इंधन यांचे वाढलेले दर व पर्यावरण संवर्धन यावर उपाय म्हणून अपारंपारिक ऊर्जेचा वापर ही काळाची गरज ओळखून मलकापूर शहरात 750 घरांमध्ये सोलर हिटर तर घनकचरा व्यवस्थापन योजनेची यशस्वी अंमलबजावणी केली आहे. शहराच्या स्वच्छतेसाठी कचरा निर्मुलनाबरोबरच भुयारी गटर योजनाही मार्गी लावली आहे. शहरात 98 टक्के कुटुंबाकडे सेप्टीक टॅंकची सुविधा करण्यात आली असून त्यातून बाहेर पडणारे सांडपाणी, बाथरुम आणि किचनमधून बाहेर पडणारे सांडपाणी भुयारी गटार योजनेमार्फत एकत्र केले जात असून त्या पाण्याचे शुध्दीकरण करुन या पाण्याचा उपयोग शेतीसाठी करण्याचे काम पूर्णत्वाकडे आहे. भुयारी सांडपाणी प्रक्रिया योजना राबविणारी राज्यातील मलकापूर ही पहिली नगरपंचायत आहे. यासह विविध योजनांच्या माध्यमातून मलकापूरचा कायापालट करण्यात आम्हाला यश आले आहे.

कन्या सुरक्षा अभियान
मुलींसाठी देशात प्रथमच राबवलेली एक महत्वाकांक्षी योजना म्हणजे “प्रेमिलाताई चव्हाण कन्या सुरक्षा अभियान’ या योजनेतून विद्यार्थीनींसाठी मोफत एस. टी. बस पासची सोय सुरु करण्यात आली असून सन 2013 ते आज अखेर या योजनेचा लाभ 2 हजार 179 विद्यार्थीनींना झाला आहे. घर ते शाळा, महाविद्यालय हा प्रवास विद्यार्थीनींसाठी निर्भय आहे.

दिव्यांग पेन्शन योजना
समाजातील प्रत्येक घटकाला न्याय मिळवून देण्यासाठी मलकापूर नगरपंचायतीने नाविन्यपुर्ण उपक्रम व योजनांची अंमलबजावणी केली आहे. महात्मा गांधी दिव्यांग आहार आणि पेन्शन योजनेअंतर्गत अवघ्या वर्षभरात 100 टक्के दिव्यांगांना दरमहा 1 हजार रुपये, 80 टक्के दिव्यांगांना 700 रुपयांची आर्थिक मदत केली आहे. त्यांच्या उदरनिर्वाहासाठी आणि व्यवसायासाठी मोलाची मदत केली जात आहे.

24 बाय 7 योजना
मलकापूर नगरपंचायतीने वेगाने प्रगती साधत 24 बाय 7 पाणी पुरवठा योजनेच्या माध्यमातून देशासह जगभरात आपली स्वतंत्र ओळख निर्माण केली असून नागरीकांचे राहणीमान उंचावले आहे. पंतप्रधान पुरस्कार, नॅशनल अर्बन वॉटर ऍवार्ड व वीज बचतीसाठीचा महाराष्ट्र शासनाचा ऍवार्ड पटकवणाऱ्या मलकापूर शहर परिसराचा चेहरामोहरा दिवसेंदिवस बदलू लागला आहे. घराघरात दररोज 24 तास मुबलक पाणी देणारे मलकापूर हे देशातील पहिले शहर ठरले आहे.

सोलर सिटी प्रकल्प
मलकापूर नगरपरिषदेने विविध योजना राबवत असतानाच पारंपारिक ऊर्जेचा तुटवडा, गॅस, इंधन यांचे वाढलेले दर व पर्यावरण संवर्धन यावरती उपाय म्हणून अपारंपारीक ऊर्जेचा वापर ही काळाची गरज ओळखून पहिल्याच टप्प्यात शहरातील 750 घरांमध्ये सोलर हिटर बसवून पर्यावरणपूरक विकासाचा श्रीगणेशा मलकापूरमधूनच करण्यात आला. दुसरा, तीसरा आणि चौथ्या टप्प्यात प्रत्येक 1500 घरांप्रमाणे नियोजन असून आगामी काळात शहरातील प्रत्येक घराला सौरऊर्जेचा लाभ मिळणार आहे.

कन्या सुरक्षा योजना
मलकापूर शहराचा सामाजिक, शैक्षणिक आणि कला, क्रीडा असा चौफेर विकास साधणाऱ्या मलकापूर नगरपंचायतीने विविध योजना प्रभावीपणे राबवत नाविन्यपूर्ण योजनांची एक प्रयोगशाळा निर्माण करुन एक आदर्श निर्माण केला आहे. स्त्री शक्तीला बळ देणारी तसेच स्त्री भ्रृण हत्या रोखणारी प्रियदर्शनी कन्यारत्न योजना भारताच्या माजी पंतप्रधान, आयर्नलेडी स्व. इंदिराजी गांधी यांच्या जन्मदिवसाचे औचित्य साधून सुरु केली आहे.

सांडपाणी प्रक्रिया योजना
संपूर्ण राज्यात मलकापूर ही भुयारी सांडपाणी प्रक्रिया योजना राबविणारी पहिली नगरपंचायत ठरली आहे. शहरात बहुतांशी ठिकाणी गटरद्वारे सांडपाणी एकत्र करुन ते नाल्यांमध्ये मलकापूर शहरातील 98 टक्के कुटुंबांकडे सेप्टीक टॅंकची सुविधा असून त्यातून बाहेर पडणारे सांडपाणी, बाथरुम आणि किचनमधून बाहेर पडणारे सांडपाणी भुयारी गटार योजनेमार्फत एकत्र केले जात असून त्या पाण्याचे शुध्दीकरण करुन या पाण्याचा उपयोग शेतीसाठी करण्याचे काम पूर्णत्वाकडे आहे.
नगरपंचायत स्थापनेपासूनच माजी मुख्यमंत्री आ. पृथ्वीराज चव्हाण यांच्या कल्पक संकल्पनेतून मलकापूर शहराचा कायापालट झाला आहे, हे नजरेआड करुन चालणार नाही. कॉंग्रेसच्या माध्यमातून मलकापूरचा कायापालट होत आहे. स्वातंत्र्य सैनिक व माजी आमदार कै. भास्करराव शिंदे यांना ज्यापद्धतीने मलकापूर शहराचा विकास अपेक्षित होता. तो वारसा आम्ही पुढे समर्थपणे सुरू ठेवलेला आहे. तसेच हा विकास करत असताना शहराची होणारी वाढ लक्षात घेवूनच राबवण्यात आलेले सर्व प्रकल्प पथदर्शी व देशाला मार्गदर्शक असे ठरले आहेत. तो बहुमान हाच मलकापूर वासियांचा अभिमान बनला असल्याचे शेवटी ते म्हणाले.

LEAVE A REPLY

Please enter your comment!
Please enter your name here

Enable Google Transliteration.(To type in English, press Ctrl+g)