तीन महिन्यांत 27 टन प्लॅस्टिक जप्त

17 लाख रुपयांचा दंड वसूल : राजरोस विक्री वापर सुरूच

पुणे – बंदी असलेल्या प्लॅस्टिकवर न्यायालयाने पर्याय दिला आहे. तरीही शहरात प्लॅस्टिकची राजरोसपणे विक्री सुरू असल्याचे चित्र आहे. जून ते 11 ऑगस्ट या कालावधीत महापालिकेच्या घनकचरा व्यवस्थापन विभागाने सुमारे 27 हजार किलो बंदी असलेले प्लॅस्टिक जप्त केले असून या विक्रेत्यांकडून 27 लाख 50 हजार 100 रुपयांचा दंडही वसूल केला आहे. तर या तीन महिन्यांत 200 किलो थर्माकोलही जप्त करण्यात आले असून हा अहवाल पालिकेने दोन दिवसांपूर्वी राज्यशासनास पाठविला आहे.

मोठ्या शहरांमध्ये प्लॅस्टिक पिशव्यांच्या बेसुमार वापरामुळे पर्यावरणाचे मोठे नुकसान होत असल्याने राज्यशासनाने सर्व प्रकारच्या प्लॅस्टिक पिशव्यांवर बंदी घालण्याचा निर्णय घेतला होता. या निर्णयाविरोधात प्लॅस्टिक उत्पादकांनी उच्च न्यायालयात धाव घेतली. न्यायालयाने याचा निकाल देताना दि.23 मार्च 2018 ला सर्व प्रकारच्या प्लॅस्टिक पिशव्यांवर सरसकट बंदी घातली होती. तसेच तीन महिन्यांत याची अंमलबजावणी करण्याची सूचना दिली. या पहिल्या तीन महिन्यांत पालिकेने तब्बल 46 हजार किलो प्लॅस्टिक जप्त केले होते. तसेच 55 लाख रुपयांचा दंडही वसूल केला होता. त्यानंतर राज्यशासनाने ही सरसकट बंदी शिथिल करत 50 मायक्रॉनपुढील प्लॅस्टिक पिशव्या वापरास मुभा दिली. या पिशव्या परत घेतल्या जातील तसेच त्याचा पुनर्वापर करणे बंधनकारक करण्यात आला आहे. पण, त्यानंतरही बंदी असलेल्या प्लॅस्टिकचा साठा विक्री केला जात आहे. त्यामुळे अशा प्लॅस्टिकची तपासणी पालिकेच्या पथकाकडून सुरूच आहे.

थर्माकोल कारावाईकडे दुर्लक्ष
एका बाजूला प्लॅस्टिकविरोधी कारवाई जोराने करतानाच थर्माकोल विक्री आणि साठ्याकडे प्रशासनाचे दुर्लक्ष होत असल्याचे समोर आले आहे. या तीन महिन्यांत फक्‍त 200 किलो थर्माकोल जप्त करण्यात आले आहे. विशेष म्हणजे, गणेशोत्सवात मोठ्या प्रमाणात थर्माकोलचे मखर विक्रीसाठी बाजारात उपलब्ध होते. मात्र, त्यांच्यावर कोणतेही कारवाई झाली नसल्याचे आकडेवारीवरून समोर येत आहे.

LEAVE A REPLY

Please enter your comment!
Please enter your name here

Enable Google Transliteration.(To type in English, press Ctrl+g)