किसान एम पे मोबाईल बॅंकिंग सुविधा

सातारा जिल्हा मध्यवर्ती सहकारी बॅंकेचे क्रांतिकारी पाऊल – सहकार मंत्री सुभाष देशमुख

सातारा : प्रत्येक जिल्ह्यात जिल्हा मध्यवर्ती सहकारी बॅंका आहेत. या बॅंकांमध्ये सातारा जिल्हा मध्यवर्ती सहकारी बॅंकेचे काम अतिशय चांगले असून या बॅंकेचे काम इतर बॅंकांसाठी दिशादर्शक आहे. सातारा जिल्हा मध्यवर्ती बॅंकेने किसान एम पे मोबाईल बॅंकिंग सुविधा सुरु करुन एक क्रांतिकारी पाऊल टाकले आहे, असे प्रतिपादन सहकार मंत्री सुभाष देशमुख यांनी केले.

येथील सातारा जिल्हा मध्यवर्ती सहकारी बॅंकेच्या यशवंतराव चव्हाण सभागृहात आज किसान एम पे मोबाईल बॅंकिंग सेवेचा शुभारंभ सहकार मंत्री सुभाष देशमुख यांच्या हस्ते करण्यात आला. त्यावेळी ते बोलत होते. याप्रसंगी विधान परिषदेचे सभापती रामराजे नाईक-निंबाळकर, खासदार उदयनराजे भोसले, महाराष्ट्र राज्य सहकारी बॅंक, मुंबईचे प्रशासकीय मंडळाचे अध्यक्ष विद्याधर अनास्कर, सातारा जिल्हा मध्यवर्ती सहकारी बॅंकेचे अध्यक्ष तथा आमदार शिवेंद्रसिंहराजे भोसले, आमदार बाळासाहेब पाटील, बॅंकेचे उपाध्यक्ष सुनिल माने, दादासाहेब खर्डेकर, नाबार्डचे सुबोध अभ्यंकर, विभागीय सह निबंधक धनंजय डोईफोडे, जिल्हा उपनिबंधक, प्रकाश आष्टेकर, माजी आमदार प्रभाकर घार्गे, बॅंकेचे मुख्य कार्यकारी अधिकारी डॉ. राजेंद्र सरकाळे, आदी यावेळी उपस्थित होते.

सहकार समृद्ध झाल्याशिवाय महाराष्ट्र समृद्ध होणार नाही, असे सांगून सहकार मंत्री सुभाष देशमुख पुढे म्हणाले, प्रत्येक शेतकऱ्याला विविध कार्यकारी सोसाट्यांमध्ये सभासद करुन घ्यावे. पाच हजार विविध कार्यकारी सोसायट्या बळकट करण्याचे उद्दिष्ट आहे. सातारा जिल्हा मध्यवर्ती सहकारी बॅंकने सोसायट्यांना स्वत:चा व्यवसाय करण्यासाठी प्रवृत्त करावे. अटल महापणन योजनेच्या माध्यमातून राज्यातील 850 सोसायट्यांनी आपला व्यवसाय सुरु केला आहे. ग्रामीण भागात काम नसल्यामुळे तेथील तरुण हा आता शहराकडे वळू लागला आगला आहे. त्याला गावातच रोजगार उपलब्ध झाला पाहिजे.

सोसायट्यांनी गावांच्या गरजेनुसार व्यवसाय सुरु केला पाहिजे त्यामुळे गावातील पैसा गावातच राहील तसेच सोसायाट्यांनी ठेवी गोळा करण्यावरही भर दिला पाहिजे, असे आवाहनही सहकार मंत्री सुभाष देशमुख यांनी शेवटी केले.
सातारा जिल्हा मध्यवर्ती सहकारी बॅंकेने किसान एम पे मोबाईल बॅंकिंग सुरु करुन एक ऐतिहासिक पाऊल टाकले आहे. सध्या सायबर गुन्ह्यांचे प्रमाणात वाढत आहे. बॅंकेनेही सायबर सेक्‍युरेटीच्या दृष्टीनेही पाऊले टाकली आहेत. ही बॅंक आता इतर बॅंकांच्या स्पर्धेत उतरली असून सहकार क्षेत्रातील अग्रण्य बॅंक आहे. शासनाने या बॅंकेला आणखीन ताकद दिली पाहिजे. किसान एम पे मोबाईल बॅंकिंग शुभारंभ हा ऐतिहासिक क्षण असून आता शेतकऱ्यांना बांधावर, पारावर बसून बॅंकींग व्यवहार करता येणार आहे. या सुविधेचा जास्तीत जास्त बॅंकेच्या सभासदांनी लाभ घ्यावा, असे आवाहन विधान परिषदेचे सभापती रामराजे नाईक निंबाळकर यांनी यावेळी केले.

सातारा जिल्हा मध्यवर्ती सहकारी बॅंक ही राज्यातील अग्रण्य बॅंक आहे. किसान एम पे मोबाईल बॅंकिंग सुविधा निर्माण केली आहे. यामुळे आता सभासदांना कोठुनही बॅंक व्यवहार करता येतील. ×पचे प्रशिक्षण सर्व शेतकऱ्यांना दिले पाहिजे. शेतकऱ्यांना त्यांच्या मागणीनुसार व त्यांच्या वेळेत कर्ज द्या. बॅंकेने मोबाईल बॅंकिंग सुविधेचा शुभारंभ केला आहे. सेक्‍युरेटीला ही महत्व द्या त्यासाठी प्रत्येक कर्मचाऱ्यांना प्रशिक्षण द्या, असे विद्याधर अनास्कर यांनी यावेळी सांगितले.
सातारा जिल्हा मध्यवर्ती सहकारी बॅंकेचे अध्यक्ष तथा आमदार शिवेंद्रसिंहराजे भोसले यांनीही बॅंकेच्या कामाचा आढावा यावेळी सांगितला.

या कार्यक्रमाचे प्रास्ताविक डॉ. राजेंद्र सरकाळे यांनी केले तर सर्व मान्यवरांचे आभार बॅंकेचे उपाध्यक्ष सुनिल माने यांनी मानले. या कार्यक्रमास बॅंकेचे सर्व संचालक मंडळ, बॅंकेचे अधिकारी, कर्मचारी, विविध सहकारी सेवा सोसायट्यांचे पदाधिकारी, शेतकरी मोठ्या संख्येने उपस्थित होते.


‘प्रभात’चे फेसबुक पेज लाईक करा

What is your reaction?
0 :thumbsup: Thumbs up
0 :heart: Love
0 :joy: Joy
0 :heart_eyes: Awesome
0 :blush: Great
0 :cry: Sad
0 :rage: Angry

LEAVE A REPLY

Please enter your comment!
Please enter your name here

Enable Google Transliteration.(To type in English, press Ctrl+g)