कायदाविश्व: धर्मांतरित व्यक्तीचा वारसाधिकार

प्रल्हादराव हे गावातील खातेदार मृत्यूपत्र न करता मयत झाले. त्यांच्या मृत्यूनंतर त्यांच्या सर्व एकत्र कुटुंबातील मिळकतीचे कुटुंबीयांमध्ये कायदेशीर नोंदणीकृत वाटप करण्यात आले. मयत प्रल्हादरावांच्या धर्मांतरित मुलालाही वाटपामध्ये हिस्सा देण्यात आला होता.

सदर नोंदणीकृत वाटपाची कागदपत्रे प्राप्त झाल्यानंतर तलाठी यांनी गाव नमुना 6 मध्ये त्याची नोंद घेतली. सर्व हितसंबंधीतांना नोटीस बजावली. नोटीस मिळाल्यावर प्रल्हादरावच्या मुलीने प्रल्हादरावांच्या धर्मांतरित मुलाला वाटपामध्ये मिळालेल्या हिश्‍याबाबत लेखी हरकत दाखल केली. तलाठी भाऊसाहेबांनी त्यांना तक्रारीची पोहोच नमुना 10 मध्ये दिली. त्यानंतर ती तक्रार गाव नमुना 6-अ मध्ये नोंदवली आणि संबंधीत 7/12 उताऱ्यावर पेन्सिलने तक्रार असे संदर्भासाठी लिहून ठेवले.

मंडलअधिकारी चावडीला भेट देण्यास आले, तेव्हा तलाठी यांनी ही तक्रार त्यांच्या निदर्शनास आणली. मंडलअधिकारी यांनी नमुना 12 मध्ये सर्व हितसंबंधीतांना नोटीस देऊन 15 दिवसानंतर सर्वांना त्याच चावडीत, पुराव्याच्या कागदपत्रांसह हजर ठेवण्याचे निर्देश तलाठी यांना दिले.

सुनावणीच्या दिवशी प्रल्हादरावच्या मुलीने हिंदू वारसा कायदा 1956, कलम 26 च्या तरतुदीचे पान दाखल केले ज्यानुसार, ‘हिंदू वारसा कायदा 1956 या अधिनियमाच्या प्रारंभानंतर, एखादी व्यक्ती धर्मांतर केल्याने हिंदू राहिली नसेल तर अशी व्यक्ती, धर्मांतरानंतर तिला झालेली आपत्ये व त्यांचे वारस एकत्र कुटुंबातील संपत्तीत वारसाने अथवा उत्तराधिकाराने हिस्सा मिळण्यास अपात्र ठरतील.’

कायद्यातील तरतूद मंडलअधिकाऱ्यांना मान्य करावीच लागली.

(संदर्भ : हिंदू वारसा कायदा 1956, कलम 26 ; महाराष्ट्र जमीन महसूल अधिनियम 1966, कलम 149 व 150.)

LEAVE A REPLY

Please enter your comment!
Please enter your name here

Enable Google Transliteration.(To type in English, press Ctrl+g)