अखेर अभिनेता धनुषने जिंकली पालकत्वाची लढाई

चेन्नई : दाक्षिणात्य अभिनेता धनुषचे आई-वडील असल्याचा दावा करणाऱ्या दाम्पत्याचा खोटारडेपणा उघड झाला आहे. कारण पालकत्वाचा वाद धनुषने जिंकला असून मद्रास उच्च न्यायालयाने त्यांची याचिका फेटाळून लावली आहे. तामिळनाडूमधील एका वयोवृद्ध जोडप्याने आपणच धनुषचे खरे आई-वडील असल्याचा दावा केला होता. थिरुप्पुवनम गावातील 65 वर्षीय कथिरेसन आणि 53 वर्षीय मीनाक्षी यांनी धनुष आपला मुलगा असल्याचा दावा करणारी याचिका दाखल केली होती. धनुषच्या वकिलांनी मात्र हा पैसे उकळण्यासाठी केलेला खटाटोप असल्याचे सांगितले होते.
धनुष हा सुपरस्टार रजनीकांत यांचा जावई आहे. 18 नोव्हेंबर 2004 ला धनुषचा रजनीची कन्या ऐश्वर्याशी लग्न केले होते. धनुष-ऐश्वर्याला यात्रा आणि लिंगा अशा दोन मुली आहेत. धनुषने दंडाधिकारी न्यायालयातील याचिका रद्द करण्याची मागणी चेन्नई उच्च न्यायालयात केली होती. धनुष हा आपला तिसरा मुलगा आहे. आमच्या उदरनिर्वाहासाठी त्याने आम्हाला महिन्याला 65 हजार रुपये द्यावेत, अशी मागणी दाम्पत्याने आपल्या याचिकेत केली होती. धनुष शाळेत असताना लहानपणीच घर सोडून पळाला होता. चेन्नईत जाऊन सिनेजगतात काम करण्यासाठी त्याने घर सोडले होते. आम्ही शोध घेऊनही तो सापडला नव्हता. मात्र सिनेमामध्ये दिसल्यानंतर आम्ही त्याला ओळखले, असेही त्यांनी आपल्या याचिकेत म्हटले होते. धनुष अकरावीत असताना हॉस्टेलमधून पळून गेला होता, असे या दाम्पत्याने नोव्हेंबर 2016 मध्ये सांगितले होते. धनुषच्या गळ्याच्या उजव्या बाजुला एक तीळ आहे, तर उजव्या मनगटावर व्रण आहे, असा दावा दाम्पत्याने केला होता. या दोन्ही जन्मखुणांविषयी शाळा हस्तांतरण दाखल्यात माहिती असल्याचेही त्यांनी म्हटले होते. 28 फेब्रुवारीला सरकारी डॉक्‍टरांकडून धनुषच्या शरीरावरील जन्मखुणांची तपासणी झाली. मदुराईतील राजाजी सरकारी रुग्णालयाच्या अधिष्ठात्यांच्या उपस्थितीत ही तपासणी करण्यात आली. डीएनए टेस्टला धनुषने नकार दिला होता, मात्र धनुषच्या शरीरावर कोणत्याही जन्मखुणा आढळल्या नाहीत. गळ्यावरील तीळ लेसर तंत्रज्ञानाने काढून टाकता येऊ शकतो, मात्र व्रण हटवता येऊ शकत नाहीत, असे डॉक्‍टरांनी स्पष्ट केले होते. कस्तुरी राजा हे धनुषचे बायोलॉजिकल पिता नाहीत. हॉस्टेलमधून पळून गेल्यावर त्याने कस्तुरी राजांकडे आश्रय घेतला. सुरुवातीला तो नोकर म्हणून राहत होता. मात्र सिनेमात त्याला मिळालेले यश पाहून कस्तुरी राजांच्या कुटुंबीयांनी त्याला स्वीकारले असा दावा या दाम्पत्याने केला होता.

LEAVE A REPLY

Please enter your comment!
Please enter your name here

Enable Google Transliteration.(To type in English, press Ctrl+g)